Wadukuzi Korea Kaskazini waiba dola milioni 615 mtandaoni

MAREKANI imewahusisha wadukuzi wanaoungwa mkono na Korea Kaskazini, na wizi mkubwa wa fedha za mtandaoni dola milioni 615 kutoka kwa wachezaji maarufu wa mchezo wa mtandaoni wa Axie Infinity Machi 2022. Anaripoti Rhoda Kanuti kwa msaada wa mashirika ya kimataifa … (endelea)

Kwa mujibu wa maafisa wa Marekani wanasema, waliohusika na uhalifu huo ni kundi linaloitwa Lazarus Group linaloaminika kudhibitiwa na Ofisi Kuu ya Korea Kaskazini.

Udukuzi huo unaweza kuwa mojawapo ya matukio makubwa zaidi, ambayo hayakuwahi kutokea katika ulimwengu wa fedha za mitandaoni.

“Wanasema kupitia uchunguzi waliweza kuthibitisha kuwa Lazarus Group na APT38, watendaji wa mtandao wanaohusishwa na (Korea Kaskazini), wanahusika na wizi huo.”

Hata hivyo FBI katika taarifa yake iliyoitoa jana Alhamisi tarehe 14 Aprili 2022 ilieleza kundi la Lazarus lilipata sifa mbaya mwaka 2014, baada ya kushutumiwa kwa kuvamia picha za Sony na kuvujisha data za siri hadharani.

Aidha jopo la Umoja wa Mataifa linalofuatilia vikwazo dhidi ya Korea Kaskazini, limeishutumu Pyongyang kwa kutumia fedha zilizoibiwa kusaidia mipango ya nyukilia na makombora ya balestiki kama njia ya kuepuka vikwazo vya kimataifa.

Marekani inafahamu DPRK imezidi kutegemea shughuli haramu, ikiwa ni pamoja na uhalifu wa mtandao kuzalisha mapato kwa silaha za maangamizi na programu za makombora ya balestiki wakati inajaribu kukwepa vikwazo vikali vya Marekani na Umoja wa Mataifa.