Serikali Z’bar yalaani ukamataji, unyanyasaji kwa wanaokula hadharani wakati wa mfungo

SERIKALI ya Zanzibar, imelaani vitendo vya baadhi ya raia kunyanyaswa kwa madai ya kukiuka taratibu za imani ya dini ya kiislam wakati wa mwezi mtukufu wa mfungo wa  Ramadhan. Anaripoti Mwandishi Wetu, Zanzibar…(endelea).

Msimamo huo wa Serikali ya Zanzibar, umetolewa na msemaji wake mkuu, Charles Hilary, katika kipindi ambacho kumeibuka mjadala wa wanaokula hadharani wakati wa mfungo wa Ramadhan, kukamatwa na Jeshi la Polisi.

“Serikali inalaani itendo vya unyanyasaji vinavyoendelea kufanyika sehemu mbalimbali Zanzibar, kadhia hiyo ni kinyume na misingi ya kuvumiliana katika imani za kidini.

“Aidha, Serikali inawahimiza wananchi kujizuia kwa namna yoyote ile kuingilia uhuru wa mtu binafsi katika kuabudu,” imesema taarifa ya Hilary.

Taarifa hiyo imesema Zanzibar inaongozwa kwa katiba inayokataza vitendo vinavyohatarisha umoja, amani na mshikamano.

“Ikumbukwe Zanzibar inaongozwa kwa Katiba, Serikali ya Mapinduzi ya Zanzibar ina mamlaka ya kuilinda Katiba ya nchi na watu wake, hivyo hatua yoyote ile yenye kuhatarisha umoja, amani na mshikamano haitavumiliwa,” imesema taarifa hiyo na kuongeza:

“Serikali itaendelea kulinda haki na uhuru wa mtu kuabudu kama ilivyoclezwa katika Katiba ya Zanzibar ya mwaka 1984. Zanzibar ni nchi yenye historia kongwe ya uvumilivu wa kidini ambapo Uislamu na Ukristo uliiingia mapema kuwa sehemu muhimu ya utamaduni uliodumu kwa karne nyingi.”

Hivi karibuni Jeshi la Polisi Mkoa wa Mjini Magharibi, liliwakamata watu 12 kwa tuhuma za kukutwa wakila hadharani mchana katika kipindi cha mfungo wa Ramadhan.