Nape ataka mifumo ya taarifa za hospitali iunganishwe

Waziri wa Habari, Mawasiliano na Teknolojia ya Habari, Nape Nnauye amesema hospitali zimekuwa na mifumo mingi ambayo haisomani kiasi ambacho imechangia kuongezeka kwa gharama za matibabu kwa wananchi. Anaripoti Mwandishi Wetu …(endelea).

Waziri Nape ameyasema hayo leo Jumamosi wakati akifunga maonesho ya tatu ya kidijitali ya Afya na Ubunifu yaliyoandaliwa na Chuo Kikuu cha Afya na Sayansi Shirikishi cha Muhimbili katika kampasi ya Mloganzanziala, jijini Dar es Salaam.

Akizungumza na vyombo vya habari mara baada ya kufunga mafunzo hayo, Nape amesema maonesho hayo yamewakutanisha wadau mbalimbali ndani na nje ya nchi ili kujadili namna TEHAMA inavyoweza kuboresha huduma za Afya.

“Tunataka kwa kupitia TEHAMA tuboreshe huduma hiyo ili mtu akienda kokote taarifa zake ziwepo,” amesema Waziri Nape.

Nape ameeleza jitihada mbalimbali zinafanywa na Serikali ya katika kufanya mifumo ya TEHAMA isomane ili kuweza kupunguza gharama kubwa ya matibabu kwa wananchi pamoja na zile za uendeshaji.

Pia amesema kuna uwekezaji mkubwa umefanyika kwenye mkongo wa Taifa wa mawasiliano ambao ndio njia kuu ya kupeleka taarifa na kuna mifumo kadhaa lazima itengenezwe ili taarifa ziwe pekee kwa kila mtu.