DC Mpanda aagiza maji ya visima yapimwe kudhibiti kipindupindu

Mkuu wa Wilaya ya Mpanda, Jamila Yusuf ameziagiza mamlaka za afya na maji kushirikiana ili kuainisha idadi ya visima vilivyopo ndani ya wilaya hiyo na kuvipima kubaini maji ya visima hivyo yana usalama kiasi gani kwa matumizi ya binadamu. Anaripoti Mwandishi Wetu …(endelea).

Mkuu huyo wa wilaya ametoa maagizo hayo leo Ijumaa  katika kikao kazi maalum cha kuweka mikakati ya kukabiliana na magonjwa ya mlipuko hususani kipindupindu.

Amesema kila kaya inatakiwa kuzingatia suala la usafi wa mazingira, ikiwemo kunawa maji tiririka sanjari na kuwataka watumishi kuanzia ngazi ya serikali ya mtaa kuweka nguvu kazi katika kutunza mazingira, hiyo ikiwa ni njia mojawapo ya kukabiliana na magonjwa ya mlipuko.

Amewataka maofisa afya kufanya ukaguzi katika maeneo ya kutolea huduma ya chakula, stendi za mabasi na maeneo mengine yanayohusisha mkusanyiko wa watu, ikiwemo maeneo ya mabucha ili kuhakikisha udhibiti unaimarishwa.