Samia ashtushwa kifo cha Jessie

RAIS Samia Suluhu Hassan amesema amepokea kwa masikitiko kicho cha aliyekuwa Naibu Katibu Mkuu wa Chama cha African National Congress (ANC), Komred Yasmin ‘Jessie’ Duarte aliyefariki mwishoni mwa wiki. Anaripoti Mwandishi Wetu, Dar es Salaam … (endelea).

Rais Samia ameelezea masikitiko yake hayo kupitia taarifa iliyotolewa leo tarehe 18 Julai, 2022 na Katibu wa Halmashauri Kuu ya CCM Taifa Itikadi na Uenezi Shaka Hamdu Shaka.

Rais Samia ameelekeza salamu zake za rambirambi kwa Mwenyekiti wa African National Congress (ANC) Komredi Gwede Mantashe na Rais wa Afrika Kusini Komred Cyril Ramaphosa.

Amesema Marehemu Yasmin alikuwa mmoja wa viongozi imara wa ANC tangu enzi za mapambano ya kupinga ubaguzi wa rangi nchini humo, akisimamia misingi ya utu kwa ajili ya jamii yenye usawa bila kijali rangi, jinsia wala utaifa ndani ya Afrika Kusini, Afrika na Dunia kwa ujumla kupitia nafasi mbalimbali alizoshika.

“Nimepokea taarifa za msiba huu kwa masikitiko makubwa. Salamu za rambirambi katika wakati huu mgumu ziwafikie familia yake, ndugu jamaa na marafiki.

Mwenyekiti wa (CCM) na Rais wa JMT Ndg. @SuluhuSamia , amewatumia salaam za rambirambi Mwenyekiti wa Chama Cha @MYANC (ANC) Cde. Gwede na Rais wa Afrika Kusini Cde.@CyrilRamaphosa kufuatia kifo cha aliyekuwa Naibu Katibu Mkuu wa ANC, Cde. Yasmin 'Jessie' Duarte. pic.twitter.com/cxOgW6yhiT

— Chama Cha Mapinduzi (@ccm_tanzania) July 18, 2022

Tuko pamoja na makomredi wote wa ANC, Afrika Kusini kwa ujumla na kwingineko kote ambao mbali na maisha ya kikazi ya Komredi Jessie pia walishirikiana naye kwa namna moja au nyingine kutekeleza wajibu wa kizalendo wa kupigania na kulinda uhuru wa Mwafrika na nchi za Afrika katika nyanja mbalimbali,” amesema.

Rais Samia alisema kitendo cha Komredi Jessie kuaminiwa kuwa msaidizi maalum wa Hayati Nelson Mandela na kuwa mjumbe wa Halmashauri Kuu ya ANC tangu mwaka 2002 na kuwa Naibu Katibu Mkuu kuanzia 2012 kinadhihirisha uwezo wake.

Amesema Marehemu Jessie amekuwa sehemu ya mafanikio kwa chama hicho tangu zama za kupigania ukombozi Serikali ya ANC na Afrika Kusini kwa ajili ya jamii yanye ustawi wa haki, usawa na maendeleo ya watu wa nchi hiyo na Afrika kwa ujumla.

Mwisho