Raila Odinga: Tutafanya maandamano makubwa mara mbili kwa wiki

Akizungumza na waandishi wa habari, muda mfupi uliopita, Raila alieleza kuwa watakuwa wakiingia mitaani kila siku za Jumatatu na Alhamisi, kila wiki hadi matakwa yao yatakaposikilizwa na kushughulikiwa.

Alisema, “katika kukabiliana na matakwa ya umma, kuanzia wiki ijayo, sasa tutafanya maandamano kila Alhamisi na Jumatatu.”

Alikemea nguvu iliyotumiwa na maafisa wa polisi jana Jumatatu, ambapo viongozi kadhaa wakuu wa Azimio na wafuasi wao walikamatwa, na polisi wakazima ndoto yao ya kuandamana hadi Ikulu ya Nairobi.

Mapema jana Jumatatu – 20 Machi 2023 – Raila aliwaambia wananchi, katika kitongoji cha Kamukunji, kwamba “hatua hiyo ya maandamano haitaisha hadi Wakenya wapate kile ambacho ni chao kwa haki.”

Aliongeza, “tumeanza vita. Kila Jumatatu kutakuwa na mgomo. Kutakuwa na maandamano. Vita imeanza na haitaisha mpaka waKenya wapate haki yao.”

Waziri Mkuu huyo wa zamani  aliwaamuru wafuasi wake kususia bidhaa kadhaa, ikiwa ni pamoja na chombo kimoja cha habari, benki moja ya kitaifa na kampuni moja ya simu.

Raila ndiye mwanasiasa pekeee wa Kenya aliyehai, ambaye amewahi kushikilia cheo cha waziri mkuu nchini humo. Alitanguliwa na aliyekuwa Rais wa kwanza wa Kenya, Jomo Kenyatta, ambaye aliyeshika wadhifa huo kati ya mwaka 1963 na 1964 baada ya Kenya kupata uhuru.

Aidha, Raila ndiye mwanasiasa pekee aliyehai ambaye katwikwa shani ya kuitwa baba wa demokrasia ya vyama vingi, sawia na marehemu Keneth Matiba.

Lakini swali la kujiuliza, ni hili: Ni vipi, kwa mara ya tano, Raila ameshindwa kwenye uchaguzi wa Urais? Kwa nini kila ashindwapo, hulalamika kuibiwa kura na kuita wafuasi wake kuandamana kila baada ya uchaguzi wa urais?

Maandamano hayo yamekuwa na faida zozote kwa wafuasi wake, kwa taifa lake; na au hata kwake binafsi? Je, huyu Raila, ameanzia wapi siasa hizo za maandamano?

Endelea kusoma MwanaHALISI Online kwa taarifa zaidi