Mpinzani mkuu Senegal aachiwa huru

KIONGOZI mkuu wa upinzani nchini Senegal, Ousmane Sonko, aliachiliwa kutoka jela jana Alhamisi jioni ikiwa ni siku chache kabla ya uchaguzi mkuu wa rais baadaye mwezi huu, na kusababisha shangwe katika mji mkuu. Inaripoti Mitandao ya Kimataifa… (endelea).

Sonko anayeonekana sana kama mpinzani mkuu wa chama tawala cha Rais Macky Sall, alipokelewa nje ya gereza na umati wa wafuasi wake wakipeperusha bendera huku wakiimba na kuinua mabango.

Sonko alikuwa gerezani tangu Julai mwaka jana na amepigana vita vya muda mrefu vya kisheria kuwania urais katika uchaguzi wa Machi 24.

Sonko na mshirika wake mkuu, Bassirou Diomaye Faye, wote waliachiliwa, wakili wake Bamba Cisse aliambia The Associated Press.

Haikuwa wazi mara moja jinsi ambavyo kutolewa kwao kutaweza kuathiri uchaguzi. Faye aliteuliwa kuwa mgombea wa upinzani baada ya Sonko kuzuiwa kuwania.

Wafuasi pia walikusanyika nyumbani kwa Sonko na katika maeneo mengine mjini Dakar kusherehekea. Misafara ya wafuasi ilizunguka mji mkuu wakipiga honi na kupiga kelele hadi usiku sana.

Sonko, ambaye alimaliza wa tatu katika uchaguzi wa urais wa 2019, ni maarufu miongoni mwa vijana na kampeni yake kali ya kukabiliana na ufisadi imekumba nchi yenye matatizo ya kiuchumi.