Mkwamo malori bandari Dar wasimamisha Bunge

KADHIA ya malori kutoshusha wala kuoandisha mizigo kwa siku tano mfululizo, imelisukuma Bunge kuahirishwa kwa dakika 20 ili kujadili mkwamo huo. Anaripoti Mwandishi Wetu, Dodoma … (endelea).

Cosato Chumi, Mbunge wa Mafinga Mjini (CCM) ndiyo aliyesimama na kujenga hoja ya kuahirishwa kwa shughuli za bunge ili kujadili mkwamo wa malori Dar es Salaam.

Akijenga hoja leo tarehe 12 Mei 2021, bungeni jijini Dodoma, Chumi amesema, bandari zetu zipo kwenye ushindani lakini akwa siku tano, kuna mkwamo wa kupakia na kushusha mizigo katika bandari ya Dar es Salaam.

“Hatuwezi kukaa kimya tkaacha mambo ya namna hii yaendelee, ndio maana ninajenga hoja, tuahirishe mjadala ili tujadili jambo hili nyeti,” amesema Chumi. Wakati akitoa hoja hiyo, Bunge lilikuwa likiendelea na mjadala wa Wizara ya Afya.

Mbunge huyo, amesema kushindwa kwa malori hayo kushusha na kupakia mizigo, ni sawa na kusimama kwa uchumi “..kwa maana uchumi kwa namna fulani umesimama.”

Ameliambia bunge, katika malori hao kuna inayokwenda katika miradi mbalimbali ya serikali ikiwa ni pamoja na uzalishaji wa umeme wa maji kwenye Bwawa la Mwalimu Nyerere pia ujenzi wa reli ya kisasa (SGR).

Kutokana na hoja hiyo, Dk. Tulia Ackson, Naibu Spika aliruhusu kujadiliwa kwa hoja hiyo kwa dakika 20. Hata hivyo, Jenista Mhagama, Waziri wa Nchi Ofisi ya Waziri Mkuu Sera, Bunge, Kazi, Ajira, Vijana na Wenye Ulemavu amesema, Kasim Majaliwa ambaye ni Waziri Mkuu anaelekea Dar es Salaam kutatua mkwamo huo.