Exim watambulisha huduma isiyo na mipaka kati ya Tanzania, Comoros

BENKI ya Exim Tanzania imetambulisha huduma yake mpya ya kibenki isiyo na mipaka kati ya Tanzania na Comoro inayolenga kutoa miamala ya gharama nafuu kwa wateja na wafanyabiashara kati ya nchi hizo mbili. Anaripoti Mwandishi Wetu … (endelea).

Akitambulisha huduma hiyo mpya katika soko la Tanzania, Sumit Shekhar, Mkuu wa Idara ya Uwekezaji Kimkakati na Matawi ya Nje wa benki hiyo alisema huduma hiyo inatoa fursa kwa wateja wa benki hiyo kuweza kufanya miamala ya kifedha kati ya nchi hizo mbili kwa kuwezesha malipo kutoka kwenye akaunti za wateja sambamba na utoaji wa fedha kupitia matawi maalum ya Exim yaliyopo Dar es Salaam, Mtwara na Zanzibar.

“Tunafuraha kuanza huduma hii tukilenga kurahisisha biashara kwa Wacomoro wanaotembelea Tanzania. Kama tunavyojua sote Comoros ni nchi ya visiwa vilivyuopo katika Bahari ya Hindi inayoshiriki mipaka ya baharini na Tanzania kaskazini-magharibi, na tayaru tumeshuhudia kuongezeka kwa maslahi ya biashara kati ya nchi hizo mbili,” alisema Shekhari katika mkutano na waandishi wa habari jijini Dar es Salaam leo.

Alitaja baadhi ya bidhaa ambazo zinapelekwa zaidi visiwani Comoros kuwa ni pamoja na  mchele, saruji, samaki, vyakula, sukari, nishati ya mafuta na magari.

“Kwa upande wao wenyewe wanaleta Tanzania zaidi karafuu, vanila, na vyombo vya usafiri wa majini. Tanzania yenye idadi kubwa ya makampuni ya viwanda nchini na miundombinu mikubwa ya bandari inatoa ushirikiano mkubwa wa kibiashara kati ya nchi zote mbili. Hivyo bidhaa hii inalenga kurahisisha hilo,” aliongeza Shekhar.

Akizungumza kwenye mkutano huo Mkuu wa kitengo cha wateja wadogo na kati wa Benki ya Exim Tanzania, Bw. Andrew Lyimo alisema hatua hiyo ni mwendelzo wa mkakati wa benki hiyo wa kuongeza ufanisi wa huduma zake za kibenki za kielektroniki ili kuwapa wateja huduma bora zaidi pamoja na kujitanua zaidi katika ukanda wa Afrika.

“Exim ni kati ya benki tano bora nchini Tanzania na benki kubwa zaidi katika visiwa vya Comoros na ni taasisi pekee ya kifedha kuwa na uwepo wake katika nchi zote mbili. Ujio wa huduma hii pamoja na faida za kibiashara na zile za kijamii pia utasaidia kuboresha ushirikiano wa kiuchumi kati ya nchi hizi mbili na pia kutengeneza fursa kwa wafanyabiashara na wazalishaji katika nchi zote mbili,’’ alisema Lyimo

Kwa mujibu wa Lyimo, kupitia bidhaa hiyo, raia wa Comoro anayetembelea Tanzania kwa sababu za biashara, matibabu au madhumuni yoyote anaweza kutoa fedha au kufanya malipo ya huduma hizo wakati wowote akiwa hapa nchini bila kuathiriwa na sababu za kimipaka baina ya mataifa haya mawili.

“Wanachohitaji wateja ni kutembelea matawi yetu mahususi kwa ajili ya huduma hii yaliyopo Dar es Salaam, Mtwara na Zanzibar hivyo kuwarahisishia kufanya biashara na kupunguza kwa kiasi kikubwa hatari na usumbufu wa kufanya biashara kwa fedha taslimu,” alitaja.

Matumizi ya huduma hiyo yanatajwa kuwa yatawanufaisha wateja wa benki hiyo kwa faida kadhaa zikiwemo; kusafiri bila pesa taslimu pamoja na urahisi, uharaka, na njia ya kuaminika ya kutoa pesa nje ya nchi.

“Zaidi kupitia huduma hii wateja wetu wanaweza kufanya malipo mbalimbali kutoka kwenye akaunti zao wakiwa nje ya nchi, kujikinga na hatari ya wizi na upotevu wa fedha na pia inawawezesha kutumia fedha zao kulingana na mahitaji yao,’’ alitaja.