Serikali yakwamisha kesi ya Idriss

MAHAKAMA ya Hakimu Mkazi Kisutu, jijini Dar es Salaam imeahirisha kesi inayomkabili Idriss Sultani, Msanii wa Vichekesho na mwenzake Innocent Maiga baada ya upande wa serikali kushindwa kukamilisha kuandaa hoja za awali. Anaripoti Faki Sosi, Dar es Salaam…(endelea).

Tarehe 27 Mei 2020 kesi hiyo iliahirishwa hadi leo tarehe 9 Juni 2020 kwa ajili ya kusomwa hoja za awali, lakini upande wa serikali umeeleza mahakama, haujamaliza kuandaa hoja za awali na kuahirishwa hadi tarehe 9 Julai 2020 kwa ajili ya kusoma hoja hizo.

Upande wa mashitaka katika kesi inayomkabili Msanii wa Vichekesho, Idris Sultan na mwenzake umeieleza Mahakama ya Hakimu Mkazi Kisutu kuwa haujakamilisha maelezo ya awali na hivyo wanaomba kupangiwa tarehe nyingine.

Mbali ya Idris Sultan, mshitakiwa mwingine ni Innocent Maiga ambapo upelelezi wa kesi yao umekamilika.

Baada ya kueleza hayo, Hakimu Mkazi Mwandamizi, Rashid Chaungu amehairisha kesi hiyo hadi Julai 9, 2020 huku dhamana ya washitakiwa hao zikiendelea.

Idris Sultan anakabiliwa na kosa la Kushindwa kufanya usajili wa simu kadi iliyokuwa inamilikiwa na mtu mwingine

Inadaiwa ametenda kosa hilo kati ya Desemba 1, 2019 na Mei 19, 2020 maeneo ya Mbezi Beach Kinondoni ambapo alitumia kadi ya simu iliyomilikiwa na Innocent Maiga bila kuripoti kwa mtoa leseni.

Kosa jingine ni kushindwa kutoa taarifa ya mabadiliko ya kadi ya simu ambapo linamkabili Innocent Maiga ambaye anadaiwa amelitenda Desemba 1, 2019 na Mei 19, 2020 Mbezi Beach Kinondoni ambapo kinyume na sheria alishindwa kutoa taarifa ya mabadiliko ya namba ya simu kama inatumiwa na Idris Sultan.