Nimekumbuka Samia wa miaka 3 iliyopita

WAKATI naandaa makala ya safu hii wiki hii, nimejikuta nakumbuka kuwa leo (19 Machi 2023), ni miaka mitatu kamili tangu Rais Samia Suluhu Hassan aape na kukabidhiwa uongozi wa taifa letu.

Nchi ilikuwa katika majonzi makubwa na mwili wa rais kipenzi cha Watanzania, John Pombe Magufuli, ulikuwa chumba cha maiti kule hospitali ya jeshi ya Lugalo.

Kwanza, nampongeza Rais Samia kwa kutimiza miaka mitatu ndani ya Ikulu yetu. Kwamba, tangu aingie madarakani, tarehe 19 Machi 2021, serikali ya Rais Samia, imefanya mambo ambayo yanaweza kufanyiwa tathmini na kuonesha mwelekeo wake katika nyanja mbalimbali, ikiwemo demokrasia na utawala bora.

Aliyoyafanya katika nyanja ya demokrasia na utawala bora, yanaweza kutumika kama kipimo cha kuweza au kushindwa kutimiza yale aliyoahidi mara baada ya kuapishwa.

Katika hotuba yake ya kulihutubia Bunge kwa mara ya kwanza, Rais Samia aliahidi Serikali yake kuendelaza mazuri ya mtangulizi wake na kuanzisha yake mapya yanayolenga kuleta umoja wa kitaifa na kuponya majeraha.

Lakini pili nakiri wazi kwamba Samia yule siyo huyu wa sasa. Yule alijiona ni rais wa mpito na huyu anajiona ni rais wa kudumu. Aliyoyosema wakati ule, anaweza kuwa anayajutia hivi sasa. Samia yule akikutana na Samia huyu wanaweza kupigana na kuumizana.

Mwandishi nguli ninayependa kusoma makala zake katika taifa hili, Askofu Dk. Benson Bagonza wa Kanisa la Kiinjili la Kilutheri Tanzania (KKKT), huko Karagwe, aliandika makala ya ushauri kwa rais Samia.

Nimeirudia mara nyingi na leo naona niitumie katika makala yangu ya wiki. Kilichoandikwa kimeandikwa, na ninaona maoni ya Askofu huyu yana nguvu kubwa hadi leo. Yanalifanya taifa lijione bado liko msibani.

MAADILI YA KUONGOZA MPITO (Transitional Management).

Rais wetu ameishaapa. Tunaye Rais mpya Ikulu. Nampongeza sana na kumtakia heri katika jukumu zito lenye hukumu alilotwishwa na Katiba.

Wosia wangu kwake ni kumshauri aiogope na kutetemeka nafasi hiyo kama sisi raia tunavyomuogopa na kumtetemekea mtu aitwaye Rais.

Kiongozi mkuu wa Nchi asiyeuogopa urais, ni hatari kwa nchi na kwake mwenyewe binafsi. Rais asiyeuogopa urais lakini anataka aogopwe, ni hatari na msiba usiokwisha kwa taifa lolote. Sasa tuyatazame baadhi ya maadili ya kipindi cha mpito.

Mh Rais amesema huu ni wakati wa “Kuzika tofauti zetu.” Kazi hii hufanyika vema endapo haya yatazingatiwa:

• Kutohamisha viapo kwa karatasi. Wateule-Kiini waliopo waweke viapo vipya vya UTII kwa Rais mpya Samia.
• Kwa umakini wa kutosha, wateule wenye hulka-mpasuko (zealots) wabadilishiwe majukumu. Taifa linahitaji kupona na kuzika tofauti.
• Bila kuathiri katiba wala kuingilia Uhuru wa mihimili mingine, Rais Samiah kama Mkuu wa nchi aelekeze kuondoa mipasuko katika vyombo vingine. Taifa linahitaji kupangusana machozi.
• Toka kale, mwaka mpya, Mfalme mpya na Sikukuu ya kitaifa, huja na habari njema kwa wananchi. Rais afungue box la zawadi kwa makundi mbalimbali yaliyonuna na kushika tama kwa sababu yoyote ile. Makundi hayo yapate tabasamu mbele ya mwezi mwandamo. Taifa letu limevimba na kununa, linahitaji mshikamano.
• Wateule wenye hulka na rekodi ya kukanyaga sheria na Katiba kwa kisingizio cha uzalendo wapumzishwe kwa heshima. Hawa ni hatari kwa Rais kuliko walivyo hatari kwa nchi. Rais wetu aimbe wimbo wa Haki tu, Kazi tutafanya na Taifa litainuka.

Kanuni kuu nyuma ya mapendekezo haya ni ukweli kuwa: Yawezekana wapo wasiopenda kuendelea kumsaidia Rais mpya, waruhusiwe kwa heshima.

Yawezekana wapo wasiopenda maridhiano ya kitaifa, wapumzike kwa heshima.

Yawezekana wapo wanaopenda kumtumikia rais kuliko kulitumikia Taifa, wajue Rais na Taifa haviachani.

Yawezekana wapo wanaopenda kutumikia vyama vyao kuliko Taifa lililoshikamana, wajue vyama hupita Taifa hubaki.

Yawezekana wapo wanaoishi kwa kutegemea Rais anavyowategemea wao kuliko anavyoitegemea katiba. Kazi ya kushauri itenganishwe na tumbo.

Kwa ajili hiyo ni muhimu kwa Rais kufanya mabadiliko ya haraka ili kutekeleza mambo matano aliyoyaahidi katika hotuba yake fupi yaani, Kuzika tofauti, bila kutazama nyuma, kushikamana, Kufuta machozi na kusonga mbele.

Mwisho, Rais yeyote mpya huingia Ikulu akiwa na hati safi hata kama alikuwa katika safu iliyopita. Rais Samia kwa sasa ana hati safi. Tumsaidie abakie msafi hadi anaondoka madarakani.

Wasaidizi wake wajaliwe hekima ya kutunza na kuhifadhi usafi wa Rais. Njia moja ya rais kutunza usafi wake, ni kukataa uwongo anaoambiwa na wasaidizi wake hata kama ni uwongo mdogo wa kuepusha rabsha fulani.

Mdomo wa Rais huifadhi kweli hata kama kwa kufanya hivyo, serikali yake itaaibika kwa muda. Ukweli huweka huru. Mungu Ambariki Sana Rais wetu.

Mwandishi wa Makala haya ni Kondo Tutindaga… (endelea).