Njama za kuvuruga mkutano KKKT zafichuka

KUNA njama zinasukwa za kutaka kuvuruga mkutano mkuu wa Kanisa Kiinjili la Kilutheri Tanzania (KKKT), kupitia kinachoitwa, “Kanisa Moja, Katiba Moja.” Anaripoti Mwandishi Wetu …(endelea).

Taarifa kutoka Arusha zinasema, baadhi ya viongozi wanalazimisha kuwapo mabadiliko ya Katiba yanayolenga kuifanya KKKT kuwa na katiba moja, hoja ambayo inapingwa na wajumbe waliowengi.

Mpango wa Kanisa Moja, Katiba Moja, unadaiwa unalenga kumbeba Dk. Shoo, ili aweze kuendelea kuwa kiongozi wa kanisa hilo.

“Kuna watu wanataka kuvuruga mkutano wetu kwa kulazimisha Kanisa hili kuwa na Katiba moja. Nakuambia hivi, hatukubali. Hii ajenda ililetwa Shinyanga mwezi uliyopita, tukaikataa. Hatuwezi kuipitisha sasa,” ameeleza mjumbe mmoja wa mkutano mkuu wa KKKT unaofanyika jijini Arusha.

Anaongeza, “tunajua nani yuko nyuma ya mpango huu. Tunajua ni kipi kinacholengwa. Tunajua. Ni bora mkutano kuvurugika, kuliko kupitisha jambo hili.”

Mwandishi ameshindwa kumpata Askofu Shoo, kuzungumzia kadhia hiyo. Anaendelea kumtafuta.

Mara kadhaa katika maadhimisho ya miaka 60 ya KKKT, Askofu Dk. Shoo aliwalaumu wanaopinga mpango huo mbele ya Rais Samia Suluhu Hassan.