Nape: Tumuongezee muda Rais Samia hadi 2030

MBUNGE wa Mtama mkoani Lindi, kupitia Chama Cha Mapinduzi (CCM), amempigia chapuo Rais Samia Suluhu Hassan, akitaka aongezewe muda wa kuiongoza Tanzania hadi 2030. Anaripoti Regina Mkonde, Dar es Salaam … (endelea).

Nape aliyekuwa Katibu wa Itikadi na Uenezi CCM, ametoa kauli hiyo jana tarehe 10 Oktoba 2021, jijini Dar es Salaam, katika kampeni ya ongea na mama, iliyoanzishwa na wasanii nchini Tanzania.

“Kuna wakati tulisema vyuma vimekaza, mama amelegeza sana kama hizi fedha zikienda kule kwenye wakandarasi mzunguko utaongezeka, nawasihi tumuunge mkono mama kwa kazi ambayo ameifanya kwa miezi nane,” alisema Nape.

Nape alisema “tukimpa amalizie hii miaka mitano, tumuongeze na mingine mitano 2025 atupeleke mpaka 2030.

Rais Samia aliingia madarakani tarehe 19 Machi 2021, kufuatia kifo cha mtangulizi wake, Hayati John Magufuli, kilichotokea tarehe 17 Machi mwaka huu.

Mwanasiasa huyo amesema, katika kipindi cha miezi nane alichokaa madarakani, amefanya mageuzi mengi yanayogusa maisha ya wananchi wa chini.

“Kimsingi mama anaupiga mwingi sana, kwa kifupi ninachoweza sema mama ameamua kutafsiri ukuaji uchumi kwenye maisha ya watu sababu hizi shughuli nilizotaja zinaenda kugusa shughuli za watu wetu vijijini.”

Nape amesema, awali Jimbo lake la Mtama lilikuwa linapokea Sh. 400 milioni kwa mwaka, kwa ajili ya ujenzi wa miundombinu ikiwemo barabara, lakini Rais Samia alivyochukua ofisi, jimbo hilo lilipatiwa Sh. 2.3 bilioni.

“Mama katika kipindi cha miezi nane ambayo amekaa madarakani ameshaleta Sh. 2.3 bilioni, maana yake ni mara tano ya fedha iliyokuwa inakuja kwa mwaka mmoja na uongeze milioni tatu. Akitokea mtu ana mashaka ya kumuunga mkono mama, basi huyo ana uwendawazimu wake mwenyewe,” alisema Nape.

Mbunge huyo wa Mtama, alisema tangu Rais Samia ameingia madarakani, malalamiko ya watu kukosa hela mfukoni yamepungua kwa kuwa ameongeza mzunguko wa fedha.

“Kama kwa miezi nane amefanya yote haya, tukimpa miaka 10 itakuwaje. Lakini mama ni msikivu na mwema, baba kidogo alikuwa mkali mkali lakini mama ana ukali kwa wale wanaofanya vibaya lakini ni mpole na ana moyo wa huruma, niwasihi tuendelee kumuunga mkono tumsaidie,” alisema Nape.