Bulembo amshukia Polepole, ataka CCM amshughulikie

MWENYEKITI Mstaafu wa Jumuiya ya Wazazi wa Chama Cha Mapinduzi, Abdallah Bulembo amemmshukia mbunge wa kuteuliwa, Humphrey Polepole akimtaka kumwacha, mwenyekiti wa chama hicho, Rais Samia Suluhu Hassan “amwache afanye majukumu yake kama Rais.” Anaripoti Mwandishi Wetu, Dar es Salaam

Bulembo aliyewahi kuwa mbunge wa kuteuliwa, amemwomba makamu mwenyekiti wa chama hicho-Bara, Philip Mangula kumchukulia hatua Polepole kwa matendo yake kama alivyowahi kuwahoji viongozi wengine wa chama hicho.

Akizungumza na waandishi wa habari jijini Dar es Salaam, leo Jumapili tarehe 12 Desemba 2021, amesema, “Lengo la Polepole ni kumkatisha tamaa Rais Samia. Hawezi ni mdogo sana. Rais Samia aachwe, namjua anaweza. Nimekaa naye namjua. Aachwe afanye kazi.”

Bulembo amesema, Polepole aliyewahi kuwa katibu wa itikadi na uenezi wa CCM, “najiuliza Mzee Philip Mangula yupo wapi kwa hili linaloendelea kwa Polepole? Kama aliweza kuwahoji makatibu wakuu Wazee Makamba na Kinana, ameshindwa nini kwa huyu Polepole? Mimi naamini, Polepole analo jambo na ukitaka kufanya jambo, usiseme nishikeni nisipigane, wewe pigana tu.”