Diwani Athuman ang’olewa Ikulu kabla ya kuapishwa

RAIS Samia Suluhu Hassan, ametengua uteuzi wa Kamishna Diwani Athumani, katika nafasi ya Katibu Mkuu Ikulu, na kumteua Mululi Majula Mahendeka, kushika wadhifa huo. Anaripoti Regina Mkonde, Dar es Salaam … (endelea).

Taarifa ya uteuzi huo imetolewa leo Alhamisi, tarehe 5 Januari 2023 na Mkurugenzi wa Mawasiliano ya Rais Ikulu, Zuhura Yunus.

Rais Samia amemtumbua Kamishna Diwani, ikiwa zimepita siku mbili tangu amteua tarehe 3 Januari 2023. Awali, alikuwa Mkurugenzi Mkuu wa Idara ya Usalama wa Taifa.

“Rais Samia ametengua uteuzi wa Kamishna Diwani, aliyemteua tarehe 3 Januari 2023. Aidha, Rais Samia amemteua Mululi Majula Mahendeka, kuwa Katibu Mkuu Ikulu. Mahendeka alikuwa Afisa Mwandamizi wa Ofisi ya Rais, Ikulu,” imesema taarifa ya Zuhura.