Watanzania waliopo Israel watakiwa kujiandikisha kabla ya saa 6 usiku

KUFUATIA kuendelea kuzorota kwa hali ya usalama nchini Israel na maeneo mengine ya jirani, Serikali ya Jamhuri ya Muungano wa Tanzania imeandaa mpango wa kuwarejesha nchini Watanzania waliopo nchini humo na maeneo mengine ya karibu. Anaripoti Mwandishi Wetu …(endelea).

Taarifa iliyotolewa leo Jumamosi na Kitengo cha Mawasiliano Serikalini – Wizara ya Mambo ya Nje na Ushirikiano wa Afrika Mashariki imesema Serikali imefikia uamuzi huo baada ya kufanya tathmini na kujiridhisha kwamba mazingira ya sasa yanaruhusu zoezi hilo kufanyika.

“Hivyo, Watanzania walio tayari kurejea nyumbani wanashauriwa kujiandikisha kwenye Ubalozi wa Jamhuri ya Muungano wa Tanzania uliopo Tel Aviv, Israel kupitia barua pepe: telaviv@nje.go.tz au simu namba: +972 533 044 978 na +972 507 650 072, kabla ya tarehe 15 Oktoba 2023, saa 6 usiku,” imesema taarifa hiyo.

Hatua hiyo imejiri baada ya Wanamgambo wa Hamasi kutoka Ukanda wa Gaza – Palestina kuishambulia Israel ambayo imeendelea kujibu mapigo na kusababisha vifo vya watu zaidi ya 2000.