Wana JOWUTA watakiwa kugombea uongozi, kulipa ada

WANACHAMA wa Chama cha Wafanyakazi wa Vyombo vya habari Tanzania (JOWUTA) wametakiwa kujitokeza kwa wingi kuwania nafasi za uongozi katika chama hicho huku wakisisitiziwa kulipa ada ili kuwa wagombea wenye sifa. Anaripoti Mwandishi Wetu, Dar es Salaam … (endelea).

Rai hiyo imetolewa jana jijini Dar es Salaam na Katibu wa JOWUTA, Selemani Msuya wakati akifungua semina ya siku mbili kwa waandishi wa habari kuhusiana na mabadiliko ya tabianchi iliyoandaliwa na chama hicho chini ya ufadhili wa Shirikisho la Waandishi wa Habari Afrika (IFJ).

Msuya alisema ni muhimu kwa wanachama wa JOWUTA kuwania nafasi za uongozi katika uchaguzi unaotarajiwa kufanyika mwishoni wa mwezi Novemba huku akisisitiza ili kuweza kuwa mgombea mwenye sifa ni lazima kulipa ada.

“Kila mwanachama hai ambaye atakuwa amelipa ada anayosifa ya kuwania uongozi,  niwaombe tujitokeze kwa wingi tarehe ya uchaguzi  itakayopagwa mwezi Novemba, ili kuweza kupata viongozi bora watakaoendeleza malengo na mambo mazuri yaliyoanzishwa,” alisema Msuya na kuongeza

“JOWUTA ni taasisi iliyosajiliwa na Serikali kwa lengo la kusimamia na kushughulikia matatizo yote yanayowakumba waandishi wa habari hivyo kama viongozi tutaendelea kulisimamia jambo hilo na watakaochaguliwa watalifanyia kazi kwa nguvu zao zote suala hilo,”alisema Msuya.

Hata hivyo Msuya aliwataka waandishi wa habari waliopata fursa ya kuhudhuria mafunzo hayo kujifunza kwa kina kisha kuhabarisha watu juu ya masuala yote yanayohusiana na mabadiliko ya tabianchi.

“Chama hiki kina wanachama wengi lakini kwa siku hizi mbili za mafunzo ni waandishi wachache wamepata bahati kuhudhuria hivyo niwaombe wale wote waliopata nafasi hiyo kujifunza kwa kina na kisha kwenda kuhabarisha  na kuelimisha umma yale yote waliojifunza,” alisema Msuya

Vilevile Msuya aliishukuru IFJ kwa kufadhili mafunzo hayo kwa waandishi wa habari kutoka mikoa mitano Tanzania na kuahidi kuendelea kushirikiana nao katika kuhakikisha kundi hilo linapata mafunzo ya kutosha ya kuwajengea uwezo.

Naye Mwakilishi wa IFJ Afrika, SokhnaDia Coly alitoa wito kwa waandishi wa habari kuongeza ushirikiano ili kukuza taasisi yao.