TFF yathibitisha Tanzania kupeleka timu nne CAF

SHIRIKISHO la Mpira wa Miguu Tanzania (TFF), limethibitisha kuwa msimu ujao wa mashindano ya Shirikisho la Mpira wa Miguu Africa (CAF), Tanzania ni moja ya nchi itakayoingiza timu nne. Anaripoti Mwandishi Wetu, Dar es Salaam … (endelea).

Kwa mujibu wa taarifa kutoka kwenye shirikisho hilo, imesema kuwa, timu hizo zitashiriki kwenye michuano ya Ligi ya Mabingwa Afrika ambapo zitaenda timu mbili, na michuano ya kombe la Shirikisho Barani Afrika, ambapo kutakuwa na timu mbili pia.

Nasafi hizo zimepatikana mara baada ya Tanzania, kuwa moja ya timu zilizokusanya pointi nyingi kwenye michuano ya CAF katika misimu ya hivi karibuni.

Michuano hiyo kwa msimu ujao wa mashindano 2021/22, itaanza kati ya tarehe 10-12 Septemba 2021 na marudiano itakuwa kati ya tarehe 17-19 Septemba 2021.

Mara baada ya michezo hiyo ya awali, hatua ya makundi ya michuano hiyo mikubwa kwa ngazi ya klabu barani Afrika, itachezwa tarehe 11-13 Februari 2022.

Hii itakuwa mara ya pili kwa Tanzania kupeleka timu nne kwenye michuano ya CAF, mara baada ya kufanya hivyo kwenye msimu wa 2019/20.

Katika msimu huo, timu nne zilizowakilisha nchi zilikuwa Simba na Yanga ambao wao walicheza michezo ya Ligi ya Mabingwa, huku KMC na Azam FC walishiriki michuano ya Kombe la Shirikisho.