Tani 13 za dawa za kulevya za kamatwa na watuhumiwa 4,983 hapa nchini

JESHI la Polisi kupitia kitengo cha Kuzuia na Kupambana na Dawa za Kulevya Tanzania limefanikiwa kukamata tani 13 .717 za dawa za kulevya pamoja na watuhumiwa 4,987 katika maeneo mbalimbali hapa nchini. Anaripoti Mwandishi Wetu, Jeshi la Polisi Dar es Salaam … (endelea).

Akitoa taarifa hiyo Mkuu wa kitengo cha Kuzuia na Kupambana na Dawa za Kulevya Tanzania, Kamishna Msaidizi wa Polisi, ACP. Amon Kakwale amesema katika kipindi cha kuanzia Januari hadi Juni 2023, ambapo kitengo hicho cha kuzuia na kupambana na dawa za kulevya kilifanikiwa kukamata kiasi cha kilogramu 9,358.77 sawa na tani 9.36 za dawa za kulevya aina ya bangi.

Ameongeza kuwa tani 4.357 za mirungi, kilogramu 1.86 za heroin pamoja na gramu 220.05 za cocaine zilikamatwa na ekari 105.25 za mashamba ya bangi na mirungi yaliteketezwa.

Katika hatua nyingine ACP Kakwale amesema operesheni hiyo ilifanikiwa kukamata watuhumiwa 4,983 ambapo kesi 3,784 zilifunguliwa na kesi hizo zipo katika hatua mbalimbali Mahakamani.

Mkuu huyo ametoa onyo kali kwa wanaoendelea kujihusisha na biashara haramu ya dawa za kulevya kuacha mara moja kwani hatua kali za kisheria zitachukuliwa kwa wakijihusisha na vitendo hivyo.