Mbowe: ICC haitawaacha

FREEMAN Mbowe, Mwenyekiti wa Chama cha Demokrasia na Maendeleo (Chadema), amesema vyombo vya ulinzi na usalama vinavyokiuka haki, hata kama vikilindwa na serikali ya Tanzania, havina kinga katika jumuiya za kimataifa. Anaripoti Mwandishi Wetu, Dar es Salaam … (endelea).

Akizungumza na wanahabari leo tarehe 16 Machi 2020, jijini Dar es Salaam, amewaeleza viongozi hao amesema “niwaambie viongozi wa majeshi wanaotumia nguvu wasidhani wana kinga duniani.

“Wasidhani wana kinga ya serikali, wajue hawana kinga katika jumuiya za kimataifa. Watambue kuna Mahakama ya Kimataifa ya Uhalifu (ICC). Haya mambo ya kutumia ofisi kulinda masilahi ya watu wakitumia ofisi zao kubagua watu, ipo siku watawajibika.”

Mbowe ameeleza hayo wakati akizungumzia madhila waliyokutana nayo baadhi ya viongozi wa Chadema, waliokwenda kumtoa katika Gereza la Segerea jijini Dar es Salaam.

“Iwavyo vyovyote matumizi ya nguvu za ziada za kupiga, kutesa na kujeruhi wanawake haviwezi kukubalika mbele ya jumuiya yoyote katika dunia hii. Bila kujali sheria gani inazungumza na mazingira gani,” amesema Mbowe na kuongeza:

“Wanavunja mbunge mkono wakisema waliowachangia wakalipie huduma ya kutibu mkono, wanapigwa wakuu viongozi wa magereza wapo wanashuhudia . Hilo jambo tunalilaani kwa nguvu zote.

“Hawakua na fimbo wanapigwa na wanaume, risasi zinapigwa za moto. Wanapambana na Halima Mdee, Esther Bulaya na  Jesca Kishoa, hawa ni wa mama. Hata katika sheria za magereza wanaoruhusiwa kushuhulika na wanawake ni wanawake tu.”