Kilombero walilia miundombinu kilimo cha umwagiliaji

CHAMA  Cha Mapinduzi  (CCM)  Wilaya ya Kilombero mkoani Morogoro, kimeiomba serikali kujenga miundombinu ya kilimo cha umwagiliaji kwa ajili ya kukuza uzalishaji wa zao la mpunga na miwa wilayani nchini. Anaripoti Victor Makonda, Morogoro …(endelea).

Ombi hilo limetolewa leo Ijumaa na Mwenyekiti wa CCM wilaya ya Kilombero, Mohamed Msuya wakati akizungumza na MwanaHALISI Online katika Mji Mdogo wa Mang’ula wilayani Kilombero.

Msuya amesema kuwa wilaya hiyo imejaaliwa ardhi kubwa yenye rutuba na ifaayo kwa kilimo cha mazao ya aina mbali mbali hususani Mpunga na miwa huku changamoto ikiwa ni ukosefu wa miundombinu ya kilimo cha umwagiliaji. 

“Wilaya ya Kilombero imejaaliwa kuwa na ardhi yenye rutuba, watu wenye ari ya kufanya kazi, changamoto ni ukosefu wa miundombinu ya umwagiliaji hali inayopelekea wakulima kulima kilimo kisicho na uhakika wa kuuvuna kwa kutegemea misimu ya mvua,” Amesema Msuya.

Msuya amesema kuwa karne hii ya Sayansi na Teknolojia, kutegemea mvua kwa ajili ya kuendesha shughuli za kilimo, sio tu kunapunguza uzalishaji wa mazao ya chakula na biashara bali pia kunafifisha kasi ya maendeleo. 

“Ninamuomba Mwenyekiti wangu wa Taifa wa CCM, Rais Samia Suluhu Hassan, kupitia Wizara ya kilimo itujengee miundombinu ya kilimo cha umwagiliaji kwani vyanzo vya maji vipo vya kutosha, ardhi ipo na watu wenye jitihada za kufanya kazi wapo,” amesema Msuya.

Msuya ameongeza kuwa Kilombero ikijengewa miundombinu ya umwagiliaji ni wazi kuwa itakuwa kitovu kikubwa cha uzalishaji wa mazao yatakayokuza uchumi wa watu wa Kilombero na kuchangia katika ukuaji wa pato la Taifa.