Dk. Mollel: Wananchi hawataki katiba mpya, wanataka maendeleo

Mwandishi WetuJuly 26, 20211 Mins read267 Views

Naibu Waziri wa Afya, Maendeleo ya Jamii, Jinsia, Wazee na Watoto nchini Tanzania, Dk. Godwin Mollel

Spread the love

NAIBU Waziri wa Afya, Dk. Godwin Mollel, amedai kwamba wananchi hawataki katiba mpya, bali wanataka maendeleo na huduma bora za kijamii. Anaripoti Mwandishi Wetu, Mtwara … (endelea).

Dk. Mollel ametoa kauli hiyo leo Jumatatu, tarehe 26 Julai 2021, katika hafla ya uwekaji jiwe la msingi la Hospitali ya Rufaa ya Kanda ya Kusini, mkoani Mtwara.

Naibu waziri huyo wa afya, amedai kuwa, wananchi wanaunga mkono msimamo wa Serikali wa kuweka kando mchakato wa upatikanaji katiba mpya, ili kuimarisha maendeleo ya nchi.

“Vijana wa Tanzania wako pamoja na nyie, nimezungumza katika ziara yangu jimboni kwangu na katika mikoa mitano, hakuna anayezungumzia katiba mpya, wote wanataka dawa, maji, huduma bora za afya na kupunguza vifo vya kina mama na watoto,” amesema Dk. Mollel.

Dk. Mollel amesema kuwa, badala ya Serikali kutumia fedha katika kuendesha Bunge la Katiba, ipeleke fedha hizo katika miradi ya maendeleo.

“Badala ya sisi kukaa bungeni kutumia fedha kutunga katiba mpya, fedha hizo mmeamua kutupa Sh. 6.5 bilioni, tuwanunulie watu wa Mtwara vifaa tiba na hospitali yao ianze,” amesema Dk. Mollel na kuongeza:

“ Badala ya sisi kutumia pesa kwenda kukaa kujadili katiba, mmeamua kutoa Sh. 157 bilioni zijenge bandari Mtwara, ambayo haitagusa watu wa korosho peke yake, itaongeza ajira kwa vijana.”

Kauli hiyo ya Dk. Mollel imekuja huku kukiwa na vuguvugu la madai ya katiba mpya, yaliyoibuliwa na baadhi ya makundi hasa ya vyama vya siasa na asasi za kiraia.

Previous post RC Dar: Kila mtu avae barakoa kwenye daladala, sokoni

Next post Dk. Mpango awaamsha wananchi Mtwara dhidi ya ugaidi Msumbiji

1 Comment

Dre says:

July 27, 2021 at 6:41 am

Katiba ya Tanzania ya sasa siyo Katiba ya wananchi… ni Katiba iliyotokana na sheria za kikoloni na mfumo wa chama kimoja. Maendeleo hayaji bila Katiba nzuri. Ndiyo maana hatuendelei kulinganana rasilimali zilizoo wala kujua mikataba ya madini ni ya miaka mingapi.
Wachina waliambiwa watarejeshewa Hong Kong baada ya miaka 90. Madini vipi?