CAG: Wastaafu, wenza wao chanzo NHIF kufilisika

RIPOTI ya ukaguzi ya Mdhibiti na Mkaguzi Mkuu wa Hesabu za Serikali (CAG) kwa mwaka wa fedha wa 2022/23, imebaini Mfuko wa Taifa wa Bima ya Afya (NHIF), umepata hasara ya Sh. 156.7 bilioni, huku ikitaja sababu mbalimbali ikiwemo viongozi wa serikali wastaafu na wenza wao kupata huduma bila ya kulipia michango. Anaripoti Mwandishi Wetu, Dar es Salaam…(endelea).

Akiwasilisha ripoti hiyo kwa Rais Samia Suluhu Hassan, leo Alhamisi, Ikulu jijini Dodoma, CAG Kichere amesema hasara hiyo imepungua kutoka kiasi cha Sh. 205.9 bilioni iliyopatikana 2021/22.

CAG Kichere wastaafu na wenza wao wanaigharimu NHIF kiasi cha Sh. 84.7 bilioni kwa mwaka.

“Changamoto nyingine inayosababisha hasara ni wastaafu kunufaika bila kuchangia, sote ni wastaafu tunaotarajiwa lakini wastaafu na wenza wa wanapata huduma bila kuchangia na hii inagharimu mfuko kiasi cha Sh. 84 bilioni kwa mwaka,” amesema CAG KIchere.

CAG Kichere amesema changamoto nyingine inayosababisha hasara ni Serikali kushindwa kuilipa NHIF fedha kiasi cha Sh. 208 bilioni ambazo inadaiwa na mfuko huo. Hata hivyo, amesema Serikali imepanga kulipa Sh. 180 bilioni mwaka ujao wa fedha wa 2024/25.

“Changamoto nyingine ni kuongezeka kwa magonjwa yasiyokuwa ya kuambukiza yanayogharimu mfuko kiasi cha Sh. 137.8 kwa mwaka. Hizo ndizo sababu zinazoongeza mashaka ya uhimilivu wa mfuko,” amesema CAG Kichere.

Hata hivyo, CAG Kichere amesema michango ya wanachama wa NHIF imeongezeka kwa asilimia 14.6 na matumizi yameongezeka kwa asilimia 10.