Bandari za Tanga na Mtwara hazihusiki uwekezaji DP World

Waziri wa Uchukuzi, Profesa Makame Mbarawa amesisitiza kwamba uwekezaji wa kampuni ya DP World kutoka Dubai hautahusisha bandari zote nchini. Anaripoti Mwandishi Wetu …(endelea.)

Amesema kwamba katika Awamu ya Pili ya Mkataba huo, chombo kitakachokuwa na mamlaka ya kuchagua bandari zinazoweza kuhusika katika uwezekezaji huo katika bandari za Bahari na Maziwa, ni Mamlaka ya Bandari Tanzania (TPA).

Aidha amesema uwekezaji huo hautahusisha Bandari ya Tanga na Mtwara kama ambavyo baadhi ya watu wamekuwa wakizusha.

Akiwasilisha bungeni maelezo ya awali kuhusu mapendekezo ya kuridhia mkataba baina ya Serikali ya Tanzania na Serikali ya Dubai katika ushirikiano wa kiuchumi na kijamii kwa ajili ya uendelezaji na uboreshaji wa utendaji kazi wa bandari za Tanzania ambapo pamoja na mambo mengine

Mikataba Mahsusi ya Miradi (Project Agreements) itajadiliwa na kuingiwa kwa kila eneo la ushirikiano na itahusisha matumizi ya ardhi pekee na sio umiliki wa ardhi.

“Msisitizo wa Serikali ni kuhakikisha maeneo yote ya nchi yanabaki chini ya umiliki wa Serikali” amesema Mbarawa.

Aidha, amesema taasisi zote za Serikali ambazo zinahusika katika shughuli za bandarini zitaendelea kutekeleza majukumu yao kwa mujibu wa Sheria ndani ya eneo la bandari.

“Uwepo wa sekta binafsi kutoa huduma katika maeneo ya bandari umeendelea kuwepo na kusimamiwa na Serikali kwa miongo tofauti tofauti. Aidha, katika kipindi chote ambacho Sekta Binafsi imehusishwa katika uendeshaji wa bandari. Hakujawahi kujitokeza tukio la kuhatarisha usalama wa nchi,” amesema.

Ameongeza kwamba “Mawanda ya uwekezaji chini ya Mkataba huu yatahusisha uendelezaji na uendeshaji wa baadhi ya maeneo ya Bandari na sio bandari yote kwa ujumla wake.”