ACT hatarini kujiondoa Serikali ya Umoja wa Kitaifa Zanzibar

KAMATI maalum ya Kamati Kuu ya ACT-Wazalendo upande wa Zanzibar, imeagiza Sekretarieti ya chama hicho kuratibu vikao vya viongozi na wanachama kwa ajili ya kutoa maelekezo yao juu ya mustakabali wa Serikali ya Umoja wa Kitaifa (SUK) na hali ya kisiasa visiwani humo. Anaripoti Mwandishi Wetu, Dar es Salaam … (endelea).

Kwa mujibu wa taarifa iliyotolewa na Katibu wa Habari, Uenezi, Mawasiliano na Umma wa ACT-Wazalendo, Salim Bimani, kamati hiyo imetoa maelekezo hayo baada ya kuketi jana tarehe 15 Novemba 2022 visiwani Zanzibar, kujadili hali ya kisiasa iliyoibuka kufuatia hatua ya Rais wa Zanzibar, Dk. Hussein Mwinyi, kumteua Thabit Idarous Faina, kuwa Mkurugenzi wa Uchaguzi wa Tume ya Uchaguzi Zanzibar (ZEC).

Taarifa ya Bimani imeeleza kuwa, kamati hiyo imeagiza vikao hivyo baada ya kutoridhishwa na hali ya kisiasa visiwani humo katika kipindi cha miaka miwili pamoja na uteuzi wa Faina, anayedaiwa kuvuruga Uchaguzi Mkuu wa 2020.

“Kikao hicho cha dharura kimeitishwa kujadili hali ya kisiasa Zanzibar kutokana na taharuki ya kisiasa iliyoibuka kufuatia uteuzi wa Mkurugenzi wa Uchaguzi wa ZEC Ndugu Thabit Idarous Faina ambaye ndiye aliyesimamia Uchaguzi Mkuu wa 2020 uliosababisha mauaji na maafa makubwa katika nchi.

“Uteuzi huo ukiambatana na matukio mengine yasiyoridhisha katika kipindi cha miaka miwili iliopita umesababisha Wazanzibar kupoteza imani na kutilia shaka uwepo wa dhamira njema na nia ya dhati ya kujenga maridhiano ya kweli na umoja wa kitaifa kama ilivyokuwa imeahidiwa,” imesema taarifa ya Bimani na kuongeza:

“Kamati Maalum ya Kamati Kuu ya Chama upande wa Zanzibar baada ya kupokea taarifa iliyowasilishwa imeielekeza Sekretarieti ya Chama upande wa Zanzibar kuratibu vikao vya ndani vya viongozi, wanachama na wafuasi wa Chama kusikiliza na kutoa maelekezo yao juu ya mustakabali wa Serikali ya Umoja wa Kitaifa na hali ya kisiasa Zanzibar.

Kamati Maalum imesisitiza kwamba vikao hivyo vya ndani vya kusikiliza maoni ni utekelezaji wa ahadi ya uongozi wa Chama Taifa ya kusikiliza maoni na tathmini ya Wanachama baada ya Miaka miwili ya ujenzi wa Maridhiano na Serikali ya Umoja wa Kitaifa.

Kamati Maalum imeagiza ripoti ya vikao hivyo iwasilishwe kwenye Kikao cha Kamati Kuu ya Chama.