Serikali yasema bei ya bidhaa Tanzania zipo chini

LICHA ya kuwepo kwa mfumuko wa bei za bidhaa duniani Serikali ya Tanzania imesema bei za bidhaa nchini mwake zipo chini ikilinganishwa na nchi zingine za Afrika Mashariki. Anaripoti Mwandishi Wetu…(endelea).

Hayo yamelezwa leo Jumatato tarehe 11 Aprili, 2022 na Waziri wa Uwekezaji, Viwanda na Biashara, Dk. Ashatu Kijaji wakati akizungumza na waandishi wa habari jijini Dar es Salaam kuhusu mwenendo wa bei nchini.

Dk. Kijaji ametaja baadhi ya bidhaa ambazo bei zake zipo chini ikilinganishwa na wastani wa bei wa nchi zingine za Afrika Mashariki.

Amesema wastani wa bei ya saruji kwa nchi zingine za Afrika Mashariki ni Sh 16,527 kwa mfuko wa kilo 50 huku Tanzania ikiwa ni Sh.16,125, “na tunaamini tunapoendelea kukaa na kuzungumza bei hiyo inaweza kushuka zaidi.”

Amesema bei ya petrol kwa nchi zingine za Afrika Mashariki ni Sh 2,971 kwa lita huku Tanzania ikiwa ni Sh 2,616 kwa bei za mwezi Machi.

“Unga wa ngano nchi zingine ni Sh 1,886 sisi ni 1,735, sukari ni Sh 3,034 sisi ni 2,670,” amesema Dk. Kijaji.

Kwa upande wa vifaa vya ujenzi amesema kwa nchi zingine kwa mabati ya geji 30 ni Sh 24,978 wakati Tanzania ni Sh 21,952.

Kwa upande wa nondo za 12mm amesema wakati nchi zingine ni Sh 42,113, nchini Tanzania zinapatikana kwa Sh 25,911 tu.

hata hivyo Dk. Kijaji amesema Serikali inaendelea kuchukua hatua zaidi kuhakikisha bei zinapungua ikiwemo Mamlaka na taasisi husika kusimamia mienendo ya bei za bidhaa bila kuumiza uapande wowote.

Pia kufanya vikao kazi na wadau wa uzalishaji ili kuhakikisha mbutuko wa uchumi wa ndani unatafutiwa ufumbuzi, kuanzisha mfumo wa upatikanaji wa bei za bidhaa mbalimbali kila siku na kituo cha mawasilinao kwa wananchi kuwasilisha maoni kuhusu bei katikamaeneo yao.