Shilole balozi mpya Oryx gesi kuhamasisha matumizi nishati safi

KAMPUNI ya Gesi ya Oryx imemtangaza Mama Lishe, Zuwena Mohamed maarufu Shilole (Shishifood) kuwa balozi wao katika kuhamasisha matumizi ya nishati safi kupikia kupitia mitungi ya gesi nchini. Anaripoti Mwandishi Wetu … (endelea).

Lengo la Oryx kumpa Ubalozi Shilole unalenga kuunga mkono juhudi za Rais Samia Suluhu ambaye ameweka malengo kuwa ifikapo mwaka 2034 asilimia 80 ya Watanzania iwe inatuminia nishati safi ya kupikia.

Akizungumza leo Alhamisi kwenye Maonesho ya 48 ya Biashara ya Kimataifa Sabasaba yanayofanyika kwenye viwanja vya Mwalimu Nyerere jijini Dar es Salaam, Meneja Mauzo na Masoko wa Oryx Gas, Shaban Fundi amesema wameamua kumchagua Shilole kwa sababu ni miongoni mwa wadau wanaohamasisha matumizi ya nishati safi ya kupikia.

Amesema kupitia kwa Shilole wanaamini kuna wengine ambao walikuwa nyuma kwenye matumizi ya nishati safi ya kupikia kuendelea kutumia gesi za Oryx kupikia.

“Tunafamu Shilole amekuwa mjasiriamali maarufu, anamiliki migahawa ya Shishifood katika miji ya Dar es Salaam na Dodoma, amekuwa mama Lishe wa kisasa na muumini  mzuri wa kutunza mazingira.

“Oryx tunaona fahari kumtangaza Shilole kuwa balozi wetu katika kuhamasisha matumizi ya nishati safi ili kwa pamoja kufikia malengo ya Rais Samia ya kuhamasisha nishati safi ya kupikia nchini,” amesema.

Kwa upande wake Shilole ambaye pia ni Msanii maarufu nchini, amesema yupo tayari kushirikiana na wadau wengine kumuunga mkono Rais Samia Suluhu Hassan katika kuhamasisha matumizi ya nishati safi ya kupikia.

Amesema Kampuni ya Oryx imekuwa ikiweka jitihada kubwa kuhamasisha matumizi nihati safi ya kupikia kwa Mama lishe na baba lishe nchini, hivyo ameona kuna umuhimu mkubwa wa kutoa ushirikiano.