Balozi wa Tanzania nchini Korea akanusha upotoshaji Tanzania kutoa sehemu ya bahari na madini

Gabriel MushiJune 4, 20241 Mins read314 Views

Balozi wa Tanzania nchini Korea, Togolani Mavura

Spread the love

Balozi wa Tanzania nchini Korea, Togolani Mavura amekanusha taarifa iliyosambazwa na chombo kimoja cha habari kuwa Tanzania imepokea mkopo kutoka Jamhuri ya Korea na kutoa sehemu ya bahari na madini. Anaripoti Mwandishi Wetu … (endelea).

Kupitia ukurasa wake rasmi wa mtandao wa X (zamani Twitter), Balozi Togolani ameandika, “Taarifa hii ina mapungufu makubwa ya kiuandishi, kiuweledi na haiakisi ukweli kwa sababu:

Kwanza, Tanzania haijasaini mkataba wowote na Jamhuri ya Korea unaohusu bahari wala madini katika ziara ya Rais Samia Suluhu nchini Korea.

“Katika ziara hiyo, Rais Samia ameshuhudia utiwaji saini wa mkataba mmoja tu ambao ni mkataba wa mkopo wa masharti nafuu wa dola za Marekani bilioni 2.5 kwa ajili ya miradi ya miundombinu.

“Mbali na mkataba huo, Rais Samia alishuhudia utiwaji saini wa Hati ya Maelewano (Memorandum of Understanding-MOU) mbili za ushirikiano katika sekta za Uchumi wa Bluu na Madini ya Kimkakati.

“Aidha, alishuhudia pia kusainiwa kwa Tamko la Utayari wa Kuanza Majadiliano ya Ushirikiano wa Kiuchumi (Joint Statement on the launch of Negotiation on Economic Partnership Agreement-EPA). Hivyo, Tanzania na Korea wametiliana saini mkataba mmoja; MOUs mbili, na Tamko moja,” amesema Mavura.

Pili, Mavura amesema Tanzania haijagawa chochote kubadilishana na mkopo nafuu kutoka Korea kama ilivyoandikwa.

Rais wa Jamhuri ya Muungano wa Tanzania, Samia Suluhu Hassan akiwa kwenye picha ya pamoja na Mwenyeji wake Rais wa Jamhuri ya Korea, Yoon Suk Yeol kabla ya kuanza mazungumzo yao katika Ikulu ya Nchi hiyo iliyopo Seoul.

Amesema Tanzania inapata mkopo wa masharti nafuu kupitia Mfuko wa Ushirikiano wa Maendeleo (EDCF) kwa mara ya tatu.

“Mara ya kwanza dola za Marekani milioni 733 (2014-2020); mara ya pili dola bilioni 1 (2021-2025) na huu mkopo wa tatu ni dola bilioni 2.5 (2024-2028).

Ameongeza kuwa nchi 59 zilizoko barani Afrika, Asia na Ulaya zinafaidika na mkopo wa aina hii kutoka EDCF edcfkorea.go.kr/he/HPHYFE043M01

“Tatu, tofauti na mlivyoandika, mkopo huu wa masharti nafuu una riba ya asilimia 0.01, unalipwa kwa miaka 40, na una fungate (grace period) ya miaka 25. Yaani unaanza kulipa baada ya mwaka wa 26. Hivyo, si kweli kwamba mkopo huo utalipwa kwa miaka mitano.

“Ni mategemeo yangu kuwa mtakuwa na uungwana wa kurekebisha taarifa hii,” ameandika Balozi Mavura.