Rais Museven agomea mdahalo wa Urais Uganda

RAIS wa muda mrefu wa Uganda, Yower Kaguta Museveni, hatahudhuria mdahalo wa wagombea urais, uliotarajiwa kumkutanisha na mpinzani wake mkuu, Robert Kyagulanyi, almaarufu Bobi Wine. Anaripoti Mwandishi Wetu … (endelea).

Kwa mujibu wa mtandao wa BBC-Swahili, mdahalo huo umeandaliwa na vyombo vya habari nchini Uganda ambapo wagombea urais wanapata fursa ya kunadi sera zao kwa mamilioni ya wapiga kura watakaofanya maamuzi yao Januari 2026 mwakani.

Wagombea hao wawili, ni miongoni mwa wagombea wanane walioidhinishwa na Tume ya uchaguzi (EC), kushiriki uchaguzi mkuu ujao.

Museveni anawania awamu ya saba madarakani baada ya kuhudumu kama kiongozi wa nchi hiyo ya Afrika Mashariki kwa takriban miongo minne.

Kiongozi wa chama tawala cha NRM aliyeingia madarakani mwaka wa 1986, anajiandaa kukabiliana na wagombea wengine saba akiwemo Bobi Wine wa chama cha NUP na Nandala James Mafabi wa chama cha FDC.

Wagombea wengine, ni Mugesha Gregory Muntu wa ANT, Mbirizi Joseph wa chama cha Conservative, Kasibante Robert wa NPP, Muyangwa Mubarak Sserunga wa chama cha Common Man, na Bulira Frank Kabinga wa chama cha RPP.

Kwa mujibu wa taasisi za uongozi bora CSIS uchumi, mfumuko wa bei, nafasi za ajira kwa vijana, huduma za afya, uchukuzi na maisha bora kwa wote sio tu masuala yanayojitokeza kwenye kampeni za uchaguzi huo utakaoandaliwa 15 Januari 2026.

Aidha, makundi ya kijamii yamelalamikia kubanwa na kudhibitiwa kutekekeza majukumu yao ipasavyo.

Katika siku chache zilizopita mwanamuziki Bobi Wine alishambuliwa katika mkutano wake wa kampeni nchini Uganda ambapo polisi waliwarushia wafuasi wake mabomu ya kutoa machozi.

“Kwa kweli, hii si haki mkuu wa polisi. Munachokifanya sio haki,” alisema Wine.

Rais Museveni kwa upande wake, ametetea serikali yake kwa kusema anataka amani na utulivu uzidi kudumu kwa ajili ya kupanua uchumi wa nchi na kuwezesha kupatikana maendeleo.

About The Author

Erasto Masalu

See author's posts