Wavumbuzi Vijana wa Tanzania Waongoza Mapambano ya Tabianchi

 

VIJANA wa Kitanzania wameonyesha ubunifu mkubwa katika kukabiliana na mabadiliko ya tabianchi kupitia YouthADAPT Demo Day lililofanyika jijini Dar es Salaam. Anaripoti Mwandishi Wetu, Dar es Salaam … (endelea)

Tukio hilo liliandaliwa na Global Center on Adaptation (GCA) kwa ushirikiano na Kenya Climate Innovation Center (KCIC) na MTI International Tanzania, chini ya mpango wa African Adaptation Acceleration Program (AAAP).

Biashara tano za vijana ziliwasilisha miradi yao bunifu ya kukabiliana na changamoto za tabianchi — hasa katika sekta za kilimo, chakula, na miundombinu.

Miradi miwili bora itapata ufadhili wa USD 30,000 kila moja na kushiriki katika mpango wa mwaka mmoja wa ushauri na uharakishaji wa biashara.

Rais wa GCA, Prof. Patrick Verkooijen, alisema “Vijana wa Afrika si wahanga wa tabianchi, bali ni wabunifu wa suluhisho endelevu.”

Mkurugenzi wa KCIC, Joseph Murabula, aliongeza kuwa mpango huu unaunda mtandao wa wajasiriamali wa kikanda wanaoongeza ustahimilivu barani Afrika.

Tukio hili ni sehemu ya juhudi za bara la Afrika kuunganisha ubunifu na uwekezaji wa kijani, na litahitimishwa kwenye Mkutano wa COP30 nchini Brazil mwezi Novemba, ambapo biashara 10 bora kutoka Afrika zitaonyeshwa kimataifa.

Akizungumza katika tukio hilo ambalo lilihusisha biashara tano za ndani zilizowasilisha miradi yao kwa ajili ya In-Country YouthADAPT Challenge, Rais na Mkurugenzi Mtendaji wa GCA, Profesa Patrick V. Verkooijen, alisema kuwa vijana wa Afrika si wahanga wa mabadiliko ya tabianchi pekee, bali ni wabunifu wa suluhisho linalohitajika zaidi.

“Kupitia changamoto ya YouthADAPT, tunageuza mawazo yao kuwa biashara zenye athari chanya na zinazoweza kuwekeza. Huu ndio uongozi halisi wa tabianchi — kuoanisha ubunifu na vipaumbele vya kitaifa na michango ya NDCs, huku tukibuni ajira zenye staha na kuimarisha mifumo ya chakula na miundombinu pale inapohitajika zaidi,” alisema.

Katika wiki za hivi karibuni, washiriki wamepitia mchakato mkali wa tathmini na ukaguzi ili kubaini waombaji bora kwa ajili ya hatua ya mwisho ya uwasilishaji. Matukio ya Demo Day yameshafanyika nchini Nigeria, Ghana, Rwanda, na sasa Tanzania, huku Kenya ikitarajiwa kuwa mwenyeji wa tukio la mwisho wiki ijayo.

Mahitaji ya Tanzania katika kukabiliana na mabadiliko ya tabianchi yanazidi kuwa ya dharura, hasa katika sekta za kilimo na miundombinu ya usafiri. Wakulima wanakabiliana na changamoto za mvua zisizotabirika, ukosefu wa maji, na upotevu wa mazao baada ya mavuno, huku sekta ya usafiri ikihitaji mifumo thabiti inayoweza kustahimili joto, mafuriko na mmomonyoko wa ardhi. In-Country YouthADAPT Challenge inalenga suluhisho shupavu, za kiteknolojia na zinazoongozwa na jamii — kama umwagiliaji rafiki kwa tabianchi, huduma za ushauri za kidijitali, na ufikivu wa masoko yenye uthabiti; pamoja na ubunifu unaolenga kuimarisha uimara na uendelevu wa miundombinu muhimu.

Tukio la Demo Day liliweka ndoto hii katika uhalisia kupitia biashara tano bora zilizowasilisha suluhisho zao bunifu za kukabiliana na mabadiliko ya tabianchi. Biashara hizi zinaonyesha namna wajasiriamali vijana wanavyogeuza uelewa wa ndani kuwa matokeo chanya yanayoweza kupanuka kitaifa na kikanda.

Majaji wa tukio hili walikuwa ni wataalamu wabobezi wenye uzoefu mkubwa katika ubunifu wa tabianchi, ujasiriamali, uwekezaji, na maendeleo endelevu. Biashara mbili kutoka Tanzania zitachaguliwa kupokea ufadhili wa ruzuku wa USD 30,000 kila moja, na kujiunga na mpango wa mwaka mmoja wa uharakishaji na ushauri elekezi, utakaowapa fursa za kupata mwongozo wa kitaalamu, masoko, na uwekezaji wa kuendeleza biashara zao.

“Tanzania inakabiliwa na changamoto za tabianchi kama nchi nyingine nyingi barani Afrika, jambo linalohitaji ubunifu wa pamoja,” alisema Joseph Murabula, Mkurugenzi Mtendaji wa Kenya Climate Innovation Center (KCIC).

“Kupitia programu hii, tunaunda mtandao wa kikanda wa wajasiriamali wenye suluhisho linaloongeza ustahimilivu ndani na nje ya mipaka.”

Tukio hili ni sehemu ya jitihada pana za bara la Afrika kujenga daraja kati ya ubunifu na uwekezaji, kwa kuwaunganisha moja kwa moja wajasiriamali vijana na wafadhili wa ndani na wa kikanda. Zaidi ya ufadhili, tukio hili limeimarisha ushirikiano muhimu kati ya vituo vya ubunifu, taasisi za serikali, na sekta binafsi zinazojitolea kuendeleza uchumi unaozingatia uhimilivu wa tabianchi.

Tukio hili la In-Country Demo Days litahitimishwa katika Mkutano wa COP30 utakaofanyika nchini Brazil mwezi Novemba, ambapo biashara 10 bora zinazoongozwa na vijana kutoka Afrika nzima zitaonyeshwa kwenye jukwaa la kimataifa kama mifano ya ujasiriamali unaoendeshwa na malengo ya uhimilivu wa tabianchi.

About The Author