Tujihadhari na vurugu, tupate maendeleo – Mwigulu

 

WAZIRI mkuu wa Jamhuri, Mwigulu Nchemba, amesema Rais Samia Suluhu Hassan, ameliagiza jeshi la polisi kuacha kumtafuta Josephat Gwajima, Askofu Mkuu wa Kanisa la Ufufuo na Uzima, kama walivyokuwa wametangaza. Anaripoti Mwandishi Wetu…(endelea).

Akizungumza na mamia ya wakazi wa Arumeru, mkoani Arusha, katika uwanja wa Magufuli Leganga, kata ya Usa River, leo (Jumapili, 30 Novemba 2025), Mwigulu alisema, “Gwajima aachwe aendelee na shughuli zake.”

Amesema baada ya Rais Samia kutoa msamaha kwa Kanisa la Ufufuo na Uzima, waumini wake wanahitaji kumuona kiongozi wao, hivyo anatakiwa kuendelee na kazi zake.

“Mwacheni ajitokekeze tujenge umoja wa kitaifa, tushikamane kurudisha umoja wa kitaifa. Tumekutana na TEC (Baraza la Maaskofu Katoriki), viongozi wa dini, mila na viongozi mbalimbali; twendeni sote kwenye jambo hili, tujitokeze tuhamasishe Tanzania yenye amani. Huu ndio wito wa kiongozi wetu wa nchi.”

Waziri mkuu huyo amewataka Watanzania wakatae kushawishiwa na wanaharakati wanaochochea vurugu kwani zinarudisha nyuma maendeleo ya nchi.

Alisema: “Nimekuja kuwapa pole wananchi wenzangu, kwa niaba ya Mheshimiwa Rais Dk. Samia Suluhu Hassan. Anatambua mambo yanayoendelea. Anatambua kazi kubwa ya kujenga taifa mnayoifanya.”

Kabla ya mkutano huo, Mwigulu alikagua uharibifu uliofanywa wakati wa vurugu za 29 Oktoba, kwenye kituo cha polisi cha Kikatiti (mita 500 kutoka barabara kuu ya Arusha – Moshi).

Katika vurgu hizo zilizotokana na maandamano ya kupinga uchaguzi, Mahakama ya Mwanzo ya Maji ya Chai (km. 3 kutoka barabara hiyo kuu); kituo cha mafuta Total Energies kilichopo Maji ya Chai, vyote vilichomwa moto ikiwemo kuiba mali kwenye supermarket na kubomoa sefu ya kutunzia fedha.

Waziri Mkuu amesema masuala ya maendeleo ya wilaya ya hiyo kama vile maji na barabara yamo kwenye Ilani ya Chama Cha Mapinduzi na kwenye ahadi za Rais, lakini yatafanyika endapo tu nchi itakuwa na amani.

“Tukichagua vurugu tutakuwa tumechagua kufukuza maendeleo, tukichagua vurugu tutakuwa tumechagua kuongeza umaskini kwa mtu mmoja mmoja,” ameonya.

Alisema, “Kila Mtanzania akatae haya yaliyotokea juzijuzi. Tumechochewa, tumechonganishwa lakini wao wako nje, wanalipwa ili kutuvuruga tu.”

Aliongeza, “Wengi wanaochochea vurugu ni wanaharakati, ambao wako nje ya nchi. Hakuna kiongozi wa chama cha siasa anasema wananchi wafanye vurugu.” Akahoji, “Au mmemuona?”

Amesema baadhi ya vijana walioko nje ya nchi wamebainika kupokea dola za Marekani 2 milioni (sawa na Sh. 4.5 bilioni) ili wachochee vurugu.

Amesema, “Hawa wanaowalipa, wana maslahi gani na nchi yetu? Wana ajenda gani na nchi yetu? Tunajua watazirudishaje hizo fedha?”

Amesema, “Hawa watu wanalenga tugombane ili wachukue madini adimu (rare earth minerals). Sasa hivi Tanzania imegundua uranium ambapo inakuwa nchi ya tisa duniani na ya kwanza barani Afrika. Ina tani za ujazo 890,000. Hii ni karibu tani milioni moja.”

Waziri Mkuu ameonya dhidi ya mchezo unaotumika kuanzisha chokochoko ili kusambaratisha nchi pindi inapobainika kuwa na rasilimali.

Amesema ziko baadhi ya nchi barani Afrika ziliathirika kutoka na chokochoko hizo.

“Wanaanzisha chokochoko, wanaacha mnavurugana, rasilmali zikiisha, wao wanaondoka,” amesisitiza.

“Watanzania tuamkeni, tuchukue tahadhari. Kuna kamchezo kanachezwa. Wanajua Tanzania ina gesi asilia nyingi na inakaribia kuanza. Wanajua ikianza miradi hii, Tanzania itakuwa ya kwanza katika Afrika Mashariki na wala hatutahitaji kutoa mikopo ya wanafunzi,” alieleza.

Amewataka Watanzania waamke na kukataa kurudishwa tena kwenye hali ya vurugu.

“Watanzania tuamke, tukatae kurejeshwa kule nyuma. Umaskini utaondolewa nchi ikiwa kwenye amani. Ajira za vijana zitaweza kupatikana nchi ikiwa kwenye amani,” amefafanua.

Amesisitiza kuwa vurugu zikiwepo, hata wakulima wa karoti na nyanya wa Ngarenanyuki hazitauzwa na hivyo kuathiri uchumi wa mtu binafsi.

About The Author