Sunil Bharti Mittal atunukiwa tuzo ya maisha ya GSMA kwa mageuzi ya sekta ya mawasiliano duniani

GSMA imemtunuku Tuzo ya Maisha (Lifetime Achievement Award) Sunil Bharti Mittal, Mwanzilishi na Mwenyekiti wa Bharti Enterprises, kwa kutambua mchango wake mkubwa katika kubadili na kuunda upya taswira ya mawasiliano ya simu duniani pamoja na kupanua wigo wa upatikanaji wa huduma za mawasiliano kwa waendeshaji, serikali, biashara na mabilioni ya watumiaji. Anaripoti Mwandishi Wetu, Dar es Salaam … (endelea).

Tuzo hiyo, ambayo imetolewa kwa viongozi wachache tu katika historia ya GSMA, hutambua mchango wa kipekee ulioacha alama ya kudumu na yenye mwelekeo katika mfumo wa kimataifa wa mawasiliano.

Tuzo hiyo ilikabidhiwa wakati wa mkutano wa Mobile World Congress uliofanyika Barcelona, mbele ya uwepo wa Mfalme Felipe VI wa Hispania, Waziri Mkuu wa Hispania Pedro Sanchez, Rais wa Catalonia Salvador Illa, pamoja na viongozi wakuu wa sekta hiyo kutoka duniani kote.

Akiwa miongoni mwa vinara wa maono katika sekta ya mawasiliano, Mittal ameijenga Bharti Airtel kuwa miongoni mwa waendeshaji wakubwa zaidi wa huduma za simu duniani, ikiwa na shughuli zake India na barani Afrika. Kampuni hiyo imeorodheshwa miongoni mwa waendeshaji watatu wakuu duniani na inahudumia zaidi ya wateja nusu bilioni.

Aliongoza upanuzi wa huduma za simu katika masoko yanayoibukia na pia aliwahi kuwa Mwenyekiti wa GSMA kati ya mwaka 2017 na 2018, ambapo alitetea sera zinazochochea uwekezaji na ubunifu, huku akiimarisha dhamira ya sekta ya kuunganisha wasiofikiwa na kukuza ujumuishwaji wa kidijitali.

Awali, Mittal alitunukiwa Tuzo ya Mwenyekiti wa GSMA mwaka 2008 na tena mwaka 2016 kwa mchango wake bora katika kukuza na kuendeleza sekta ya simu duniani, na aliheshimiwa tena wakati wa Mobile World Congress mwezi Februari 2019 kwa kutambua uongozi wake kama Mwenyekiti wa GSMA.

Akizungumza baada ya kupokea tuzo hiyo, Mittal alisema: “Nimeheshimiwa sana kupokea tuzo hii na ninaishukuru kwa dhati GSMA kwa kunitambua. Naipokea si tu kama mafanikio binafsi, bali kama heshima kwa safari ya sekta ya mawasiliano ya India, ari ya pamoja ya Bharti, na kuibuka kwa kampuni za mawasiliano za India katika jukwaa la kimataifa. Sekta ya mawasiliano ni nguvu inayopanua fursa, inayoweka huduma muhimu mikononi mwa kila mtu na kufungua uwezo wa kibinadamu.

“Kushiriki katika kuunda mageuzi yake na kuifanya kuwa kichocheo kikubwa cha maendeleo ya kisasa ni jukumu la heshima kubwa. Kadiri ubunifu unavyozidi kushika kasi, tutaendelea kushirikiana na wadau wetu kuhakikisha ukuaji unaendeleza usawa na kuleta fursa endelevu kwa vizazi vijavyo.”

Tuzo ya Maisha ya GSMA ni heshima adimu inayotolewa kwa watu wachache tu waliodhihirisha uongozi na ubunifu uliobadili mwelekeo wa sekta kwa namna ya kudumu.

About The Author

Erasto Masalu

See author's posts