Joto la 9 Desemba lafukuta

 

KIWEWE cha kuwapo maandamano ya tarehe 9 Desemba mwaka huu na ambayo yamepewa jina la ‘D9,’ kinazidi kupamba moto nchini Tanzania. Anaripoti Mwandishi Wetu, Dar es Salaam … (endelea).

Kiwewe cha sasa, kinachagizwa na mijadala kwenye mitandao ya kijamii na kauli mbalimbali za viongozi wa kisaisa na vyombo vya dola.

Athuman Juma, mkazi wa Kinondoni jijini Dar es Salaam ameiambia MwanaHALISI Online, tayari ameanza kuchukua tahadhari ya kuweka vyakula ndani ili likitokea la kutokea, basi yeye na familia yake wasipate shida.

“…haya mambo hayaeleweki, tahadhari ni muhimu ingawa mimi binafsi naamini serikali imeshachukua tahadhari zote za kiusalama,” anaeleza.

Anaongeza, “lakini ikitokea tofauti, basi tuwe na chakula cha kutosha ndani,” ameeleza.

Naye mkuu wa Polisi wa Wilaya ya Chunya, SSP Nestory John, ameeleza kuwa “kuelekea ‘D9,’ ameagiza wauzaji wa mafuta wilayani mwake, kutowauzia madereva wa bodaboda mafuta yanayozidi lita moja kwa wakati mmoja.

Aidha, mkuu huyo wa polisi amesema, wale wanaoendesha biashara za mafuta katika vidumu, nao watafuatiliwa.

Afisa huyo wa polisi amewataka wamiliki wa vituo vya mafuta, kufunga kamera za ulinzi (CCTV), katika maeneo mbalimbali ya majengo yao, ili kuongeza uwezo wa kutambua matukio ya kiusalama kwa wakati.

Alitoa kauli hiyo, wakati akizungumza na wamiliki wa pikipiki, kwa lengo la kubaini wanaoshabikia maandamano.

Hata hivyo, jeshi hilo, limesema linafanya uchunguzi taarifa inayoenea kwenye mitandao ya kijamii ikidaiwa kutolewa na Mkuu wa Polisi Wilaya (OCD) wa Chunya, mkoani Mbeya, inayomwonesha akitoa maelekezo kwa wamiliki wa vituo vya mafuta.

Kwa mujibu wa taarifa iliyotolewa na Msemaji wa Polisi makao makuu Dodoma, DCP David Misime, tarehe 26 Novemba 2025, OCD hana mamlaka ya kuitisha waandishi wa habari na kutoa taarifa kwao, hivyo chanzo na uhalali wa taarifa hiyo vinachunguzwa.

Katika taarifa hiyo, jeshi hilo limesema, limechukua hatua za haraka kufuatilia video na maelezo yanayosambaa mtandaoni ili kubaini ukweli wake.

Amesema, “Taratibu rasmi lazima zifuatwe katika utoaji wa taarifa za kiusalama. Uchunguzi unafanyika ili kupata ukweli wa taarifa hiyo. “

Ameongeza, “hana mamlaka ya kuita waandishi wa habari na kutoa taarifa kwao. Ikibainika hivyo hatua stahiki zitachukuliwa mara moja.”

Mwenyekiti wa umoja wa Vijana wa Chama Cha Mapinduzi mkoa wa Dar es Salaam (UV-CCM), Nasra Mohamed, amewataka vijana kuepuka kujiingiza katika wito wa kufanya maandamano ya 9 Desemba 2025.

Amesema, maandamano hayo hayana msingi na yanachochewa na watu wenye malengo yao binafsi.

Akizungumza na wahariri wa vyombo vya habari, Jumanne iliyopita, Waziri Mkuu Dk. Mwigulu Nchemba, alitoa wito wa kutotengeneza majanga mengine mapya.

Mwigulu amesema kuwa serikali imefungua milango kwa mtu mwenye dukuduku na kwamba Rais Samia Suluhu Hassan na wasaidizi wake wote, wako tayari kusikiliza kila mwananchi.

Wachambuzi wa masuala ya kisiasa wanasema, kuna dhana mbili kwenye tishio la maandamano; wapo wanaosema waandamanaji wanaweza kurudi nyuma kutokana na yale yaliyotokea 29 Oktoba na wengine wakisema, “wanaweza kuthubutu.”

Maandamano ya 29 Oktoba, yameacha doa kubwa nchini, ambapo watu kadhaa wanahofia kufariki dunia na wengine kadhaa kujeruhiwa.

About The Author