Bunge la Ulaya laitaka Tanzania kumuachia huru Lissu

 

BUNGE la Ulaya limeitaka Serikali ya Tanzania kumfutia mashtaka na kumuachia huru Tundu Lissu, Mwenyekiti wa Chama cha Demokrasia na Maendeleo (Chadema), pamoja na kurejesha ushiriki wa chama hicho kwenye uchaguzi Mkuu wa Oktoba mwaka huu. Anaripoti Joyce Ndeki, Dar es Salaam … (endelea).

Maazimio hayo ambayo yamepigiwa kura leo tarehe 8 Mei 2025 yamelaani kitendo cha kukamatwa kw Lissu na kueleza kuwa kitendo hicho kina sura ya kisiasa.

Bunge hilo limejadili hatari ya tuhuma zinazomkabili Lissu na kueleza kuwa zina sura ya kisiasa zenye uelekeo wa adhabu ya kifo.

Hatua hiyo imefikiwa baada ya bunge hilo kufanya kikao cha dharura kujadili suala la Lissu, mapema wiki hii.

Bunge hilo limeitaka serikali ya Tanzania kumwachilia Lissu, haraka bila masharti yoyote na kuhakikisha usalama wake, haki yake ya kusikilizwa kwa haki na uwakilishi wa kisheria.

Wabunge hao wanazitaka mamlaka za Tanzania kukomesha ukandamizaji unaoendelea, ukamataji hovyo, unyanyasaji, mashambulizi na unyanyasaji dhidi ya wanachama wa upinzani, watetezi wa haki za binadamu, watu wa kiasili, wanaharakati wa LGBTIQ+, waandishi wa habari na mashirika ya kiraia.

Bunge hilo limesisitiza uchunguzi huru kwa tuhuma za dhuluma za polisi na kupotea kwa watu, kudumisha utawala, sheria, vyombo vya habari, uhuru wa kujieleza, uhuru wa vyombo vya habari na mahakama.

Pia wameitaka Tanzania kuzingatia sheria za kimataifa za haki za binadamu hususan katika eneo la sheria za uhalifu wa mtandaoni na vyombo vya habari , kuheshimu haki za vyama vya siasa na kuhakikisha uchaguzi huru na wa haki.

Wito kwa mamlaka za Tanzania kurejesha ushiriki kamili wa Chadema katika uchaguzi wa Oktoba 2025, na kushirikiana na vyama vyote vya siasa katika mazungumzo ya uwazi na jumuishi kuhusu mageuzi ya uchaguzi, kwa kushauriana na mashirika ya kiraia na wadau wengine.

Wito nchi wanachama wake kuwasiliana kwa kina na mamlaka za Tanzania kuhusu kesi ya Lissu na kufuatilia kwa karibu kesi; inawataka kuzingatia hatua zinazofaa ikiwa hali ya haki za binadamu itaendelea kuzorota.

Wanaitaka Tanzania kufuta hukumu ya kifo na kubadilisha hukumu zote za kifo.

Wanasisitiza haja ya EU kuhakikisha kwamba ushirikiano wake wa kimaendeleo na Tanzania, ikiwa ni pamoja na mpango wa Global Gateway, unaendana na uendelezaji wa haki za binadamu, uhuru wa kujieleza na viwango vya kesi vyenye haki.

Wabunge hao wanamuagiza Rais wake kupeleka azimio hilo kwa Serikali na Bunge la Tanzania pamoja na Umoja wa Afrika.

About The Author