Simba wagawanyika

 

KLABU ya soka ya Simba sasa imekumbwa na mgawanyiko, kufuatia hatua ya seriali kutaka Mwenyekiti anayetokana na wanachama kuwa ndiye msimamizi wa mali na klabu. Anaripoti Fedrick Gama, Dar es Salaam … (endelea).

Tayari baadhi ya wanachama wanaomtetea muwekezaji wa sasa, Mohammed Dewji (MO), wameanza kuwatuhumu baadhi ya viongozi wao, kwamba wanataka kuhujumu maenedeleo ya klabu yao.

Katika barua yake kwa uongozi wa Simba Sports Klabu, serikali kupitia Baraza lake la Michezo la Taifa (BMT), imetaka katiba mpya ya Simba kumtambua Mwenyekiti wa Klabu kuwa ndiye Mwenyekiti wa Bodi ya Wakurugenzi kwa kuwa klabu ndio inayomiliki asilimia 51 ya hisa na wawekezaji wanamiliki 49 asilimia.

Aidha, Serikali inataka kuwepo na wawekezaji kuanzia watatu, badala ya mmoja aliyepo sasa.

Kwa mujibu wa barua ya tarehe 25 Oktoba kutoka BMT kwenda Afisa Mtendaji Mkuu wa Simba, baraza hilo, linakubaliana na ushauri wa Mwanasheria Mkuu wa Serikali, kuhusiana na “mabadiliko ya muundo wa uendeshaji” katika klabu hiyo.

Barua kutoka BMT kwenda klabu ya michezo ya Simba, imebeba Kumb. Na. CA.45/100/01A/8 na kichwa cha maneno kisemacho: “Marekebisho ya Katiba ya Simba Sports Club 2018.”

Barua inasema, “…Baraza la Michezo la Taifa, linaunga mkono kikamilifu ushauri wa Ofisi ya Mwanasheria Mkuu wa Serikali, kwa kuwa ushauri huo ndiyo msingi ambao Baraza liliutumia kuielekeza Simba Sports Club kufanya marekebisho ya Katiba, kama sehemu ya kukamilisha mabadiliko ya muundo wa uendeshaji wa klabu.

Baraza limesema, limepitia maombi ya timu hiyo na kubaini kuwa yapo maeneo ya kimuundo na kiutawala yanayohusiana na maslahi ya wanachama ambayo bado hayajafanyiwa marekebisho.

Kwa msingi huo, BMT linaelekeza yafanyiwe marekebisho ndani ya Rasimu kabla ya kuwasilishwa katika mkutano mkuu wa kwa kuwa Katiba ya Simba Sports Club haina Kamati ya Utendaji.

Maeneo mengine ambayo yanapaswa kufanyiwa marekebisho, Bodi ya inayotokana na wanachama wawe na jukumu la kupendekeza majina ya wajumbe wa Baraza la Wadhamini kwa lengo la kulinda na kuimarisha uwakilishi wa wanachama katika usimamizi wa mali na maslahi ya klabu kama wamiliki halali.

Aidha, Serikali imetaka kurekebishwa kwa matumizi ya neno “Mwekezaji” ndani ya rasimu ya Katiba na badala yake itumike dhana pana ya “Wawekezaji” na iweke bayana kuwa Baraza la Wadhamini kwa niaba ya wanachama, ndilo litakaloingia mikataba na makubaliano yoyote na wawekezaji.

Marekebisho haya yanakusudia kupanua wigo wa uwekezaji wa kibiashara ndani ya klabu kwa maendeleo ya klabu na ulinzi wa maslahi ya wanachama kama wamiliki halali wa Simba Sports Club.

Kufanyika kwa mabadiliko hayo, kutamuondoa moja kwa moja, MO kama mwekezaji wa sasa wa klabu hiyo atakuwa anaondoka kwa nguvu hasa za kwenye maamuzi.

Mkutano mkuu wa Simba utafanyika taree 30 Novemba 2025, katika ukumbi wa Diamond Jubilee, jijini Dar es Salaam.

Mwenyekiti wa Bodi ya klabu hiyo Cresentius Magoli, amenukuliwa kwenye vyombo vya habari akisema kuwa kuna baadhi ya viongozi wanafurahia Simba ikifungwa na kukosa mafanikio.

“Kuna shida ya afya ya akili, kwa sababu haiwezi kuwa hali ya kawaida kwa baadhi ya viongozi wa sasa na zamani kufurahia Simba ikifungwa,” alieleza.

Katika mchezo uliopita wa Ligi ya Mabingwa Barani Afrika Simba ilipoteza kwa bao 1-0 dhidi ya Petro De Luanda ya nchini Angola.

Sintofahamu hiyo inakuja kufuatia uwepo wa taarifa za kwamba katika ajenda ambazo zimetumwa kwa wanachama ambao ni wajumbe wa mkutano mkuu, ajenda zilizotokana na maelekezo yaliyotolewa na Baraza hilo hayapo.

About The Author