Waliopisha ujenzi uwanja wa ndege Mpanda walipwa

SERIKALI imekamilisha ulipaji wa fidia kwa wananchi waliopisha upanuzi wa ujenzi wa viwanja vya ndege Mpanda katika mkoa wa Rukwa. Anaandika Dany Tibason … (endelea).

Kauli hiyo ilitolewa  bungeni na Naibu Waziri wa Ofisi ya Waziri, Tamisemi Aggrey Mwanri, ambaye amesema  kuwa Serikali ilitwaa baadhi ya maeneo hayo katika kipindi cha mwaka 2011 kwa ajili ya shughuli za ujenzi wa kiwanja cha ndege katika mji wa Mpanda.

Mwanri akijibu swali la mbunge wa Mpanda Mjini, Said Arfi (Chadema), ambaye alitaka kujua kama ni utawala bora kwa wananchi wa Mpanda waliopisha ujenzi wa uwanja wa ndege ambao wamekosa baadhi ya huduma kama barabara na maji.

Mbunge huyo  alitaka kujua ni hatua gani zimefikiwa za kuondoa kero hiyo baada ya tume kufika na kuzungumza na wananchi wa maeneo hayo husika.

Naibu Waziri alisema ili kutekeleza azma hiyo, Serikali ilitwaa maeneo ya wananchi ili kuwa na eneo la kutosha kwa ajili hiyo na upanuzi huo ulihusisha maeneo ambayo hayakuwa maalumu kwa ajili ya makazi ya watu kuishi.

“Kuhusu kuondoa kero kwa wananchi waliokuwa kwenye maeneo yao kupisha ujenzi wa uwanja wa ndege ambako Mkuu wa wilaya aliunda tume ya kusimamia na kuhakikisha haki inatendeka kwa kila mwananchi kulipwa fidia stahiki,” amesema Mwanri.

Amesema hatua zingine zilizochukuliwa ni ujenzi wa barabara yenye urefu wa kilimota 1.5 kwa gharama ya sh 30 milioni katika eneo la Airtel lililoko katika Kata ya Nsemulwa na ujenzi wa mradi wa maji wa Ikorongo ambao unavituo viwili vya kuchotea maji.