July 26, 2021

Uhuru hauna Mipaka

Wafugaji watoa tamko zito kwa serikali

Spread the love

JUMLA ya Asasi 45  zinazofanya kazi na wafugaji wa asili kuhusu migogoro ya ardhi Tanzania, wamelaani na kutoa tamko la kuitaka serikali kuwawajibisha watumishi wote wa serikali na baadhi ya viongozi wa dini ambao wanasababisha kuwepo kwa migogoro ya ardhi nchini na kusababisha   watu kupoteza maisha na mifugo kuuliwa. Anaandika Dany Tibason, Dodoma … (endelea).

Katika tamko hilo lililosomwa katika mkutano wa wadau wa programu ya wafugaji wa asili Tanzania na Mkurugenzi wa Shirika la Cedesota, Jackson Muro amesema migogoro mingi imekuwa ikifanywa na watumishi wa serikali au viongozi wa dini kutokana na kutokuwa waaminifu kwa kutaka rushwa.

Kwenye tamko hilo Muro amesema kwa kauli moja washiriki hao wanaitaka serikali kuwajibika kwa kuhakikisha wanakabiliana kwa haraka na tatizo hilo jambo ambalo linasababisha kuwepo kwa migogoro isiyoisha.

Amesema migogoro mingi ya ardhi haiwaathiri tu wafugaji pekee bali inayakumba makundi mengine na kusababisha kuwepo kwa matatizo mengine.

Alivitaja vyanzo vya migogoro hiyo amesema kuwa ni Sheria ya utambuzi wa mifugo 2010 kuanzia uhamiaji wa wafugaji wa asili na mifugo, Sheria ya wanyamapori 1998 inazuia uhamiaji wa wafugaji katika maeneo ya wanyamapori ilihali maeneo mengi yanayofaa kwa malisho yakitwaliwa kwa ajili ya uhifadhi.

Walitaja sababu nyingine ambazo zinasababisha migogoro ni pamoja na Sheria ya hifadhi ya mazingira ya Mwaka 2007 inaainisha kuwa ufugaji wa asili ni moja ya vyanzo vya uharibifu wa mazingira jambo linalopotosha jamii na kusababisha migongano baina ya wafugaji asili, Mamlaka husika na makundi mengine, licha ya kwamba ufugaji asili ni rafiki wa mazingira.

Amesema kutokana na kuwepo kwa migogoro ya ardhi hiyo kunapelekea watu kuuwawa huku mifugo nayo ikiuwawa jambo ambalo linasababisha umasikini.

“Migogoro ya ardhi imesababisha kuwepo kwa vifo vingi vya watu mifugo, majeruhi na ulemavu wa kudumu, uharibifu wa mali na mazao mashambani, kuzorotesha shughuli za uzalishaji mali kutokana na hofu miongoni mwa wanajamii, umasikini, visa na chuki miongoni mwa jamii, ubakaji na vingine vya ukiukwaji wa haki za binadamu pamoja na uharibifu wa makazi,” amesema Muro.

“Kutokana na kuwepo kwa matukio hayo umoja huo taasisi zisizo za kiserikali tunachukua hatua hii kulaani, vitendo vya uvunjifu wa amani ,haki za kibianadamu na za wanyama vilivyojitokeza wilayani Mvomero na Kilosa Mkoani Morogoro Desemba 14 mwaka huu vilivyopelekea vifo watu na mifigo.

“Kwa kauli moja tunatoa tamko la kuitaka serikali iwajibike na kumtaka waziri ardhi kubainisha na kuweka wazi maeneo yote ya wafugaji yaliyoodhiwa na wawekezaji wasio rasmi na wasio rasm ili yarejeshwe kwa wafugaji.

“Serikali kwa kushirikiana na wadau iwe mkakati wa pamoja wa kuelimisha Umma juu ya umuhimu wa amani baina ya makundi yote katika jamii na kulinda haki ya kila mmoja,” lilisema tamko hilo lenye mambo 8.

Kwa upande wake mwakilishi wa Katibu mkuu wa Wizara ya Maendeleo ya Mifugo na Uvuvi, Anociata Njombe alikiri kuwepo kwa mgogoro wa ardhi kwa muda mrefu ambao kwa sasa unatafutiwa suluhisho na serikali ya awamu ya tano.

“Pamoja na ukweli kwamba ufugaji ni shughuli ya kiuchumi kwa hapa nchini bado lipo pengo la kisera katika kukidhi malengo na mahitaji halisi ya kuboresha ufugaji wa asili,” amesema.

Amesema ni kweli wafugaji wanaendelea kukabiliwa na changamoto nyingi zikiwemo za ukosefu wa maeneo ya malisho kutokana na mabadiliko ya tabia ya nchi.

Amesema kuna changamoto nyingine ambayo ni ukosefu wa malisho na maji, magonjwa ya mifugo na ukosefu wa huduma za jamii katika maeneo ya wafugaji asili.

“Changamoto hizi zimezidi kuongezwa makali na kasi ndogo ya migango ya matumizi ya ardhi na kutenga maeneo kwa ajili ya wafugaji,” amesema Njombe.

error: Content is protected !!