Vituo chanjo ya Corona vyaongezwa, Msigwa awapa neno wasiochanjwa

SERIKALI ya Tanzania imeongeza vituo vya utoaji huduma ya chanjo ya ugonjwa wa Corona (UVIKO-19), kutoka 550 hadi 6,784 nchi nzima. Anaripoti Regina Mkonde, Dar es Salaam … (endelea).

Taarifa hiyo imetolewa leo Jumapili, tarehe 19 Septemba 2021 na Msemaji Mkuu wa Serikali, Gerson Msigwa, akizungumza na wanahabari jijini Dodoma.

“Zoezi linalofanyika sasa tulikuwa na vituo 550 tumeongeza kwenda vituo 6,784. Yaani vituo vyote vya Tanzania vinavyotoa chanjo mbalimbali, sasa vinapewa chanjo ya uviko 19- Msemaji Mkuu wa Serikali, Gerson Msigwa.

Akitaja takwimu za watu waliopata chanjo tangu zoezi hilo lizunduliwe na Rais Samia Suluhu Hassan, mwishoni mwa Agosti 2021, Msigwa amesema watu 360,000 wamepata chanjo hiyo.

“Katika zile chanjo 1,540,400 za UVIKO-19, chanjo takribani  360,000 tayari Watanzania wameshapewa chanjo,” amesema Msigwa.

Msigwa amesema, Serikali iko katika mpango wa pili wa kuhimiza wananchi kupata chanjo ya UVIKO-19, ambapo watalaam wanaotoa huduma hiyo wanawafuata wananchi katika maeneo yao, hasa vijijini.

Msigwa amesema, Serikali imeanza mpango huo ili chanjo hizo ziwafikie wananchi wengine.

“Kazi inayofanywa na Serikali kwenye mpango wa pili wa kuhimiza chanjo, wataalamu wanatoka kwenye vituo wanakwenda kuwafuata wananchi vijijini, Watanzania wote wapate fursa ya kupata chanjo ya UVIKO-19 kule waliko, kupitia huduma ya mkoba,” amesema Msigwa.

Aidha, Msigwa amewaomba Watanzania wasiopata huduma hiyo, wakachanjwe ili kukwepa athari za janga hilo linaloitikisa dunia.

“Sitaki kuwatisha, lakini ningependa kuwaambia Watanzania, takwimu za wataalamu wa afya watazitoa karibuni. Lakini kwa sehemu kubwa ya watu waliolazwa kutokana na UVIKO-19, ambao wapo kwenye hali mbaya ni wale ambao hawajachanjwa,” amesema Msigwa na kuongeza:

“Wale waliochanjwa ukipatwa na UVIKO-19, unapewa matibabu unatoka unaenda nyumbani unaendelea na kazi zako, wasio chanjwa hoi taaban wamewekwa mashine. Wanapumua kwa msaada wa mashine na wanaokufa kwa sehemu kubwa ni wale wasiochanjwa.”