Soko la filamu lakosa mvuto

SOKO la Filamu nchini limetajwa  kuangukia pua na kupoteza umaarufu kutokana na kukosekana kwa ubunifu katika kazi hizo pamoja na wizi wa kazi za wasanii uliokithiri. Anaandika Ferdinand Shayo, Arusha … (endelea). 

Filamu zinazorekodiwa nchini zinadaiwa kupoteza umaarufu nchini kiasi cha kusababisha soko lake kuangukia pua, huku waandaji na wasambazaji wake wengi wakiamua kujitoa na kutafuta shughuli zingine za kufanya.

Mwenyekiti wa Taifa wa Umoja wa wasambazaji wa kazi za Sanaa nchini,  ‘Tanzania Audio Visual Works Distributors,’ Baraka Nyanda, wamelaumu kushuka kwa ubunifu miongoni mwa wasanii.

Aidha,amesema kukosa ubunifu  kumepelekea kuwepo wa sinema na miziki hafifu isiyoweza kustahimili ushindani wa soko la kazi za burudani duniani.

“Tathmini kutoka wasambazaji waliochini ya ‘Tanzania Audio Visual Works Distributors,’ ambao wanafikia 200 kwa sasa, imeonesha kupungua kwa kazi za Sanaa yaani muziki na filamu kwa asilimia Zaidi ya 50 na hii imesababishwa na kukosekana kwa masoko ya kazi hizo nchini,” amesema Nyanda.

Wakizungumza jijini hapa wakati wa kikao maalum kati ya wasambazaji na wasanii, viongozi hao wamebainisha kuwa tasnia ya filamu na muziki nchini ilikuwa na mafanikio kuanzia mwaka 2005.

Amesema zaidi ya kazi  300 zilikuwa zinafyatuliwa kila mwaka kwa mujibu wa ripoti ya Media for Development International ya 2011.

“Kipindi hicho tulishihudia filamu mpya takriban 10 zikitolewa kila wiki, lakini hali ni tofauti kwa sasa ambapo tunashuhudia chini ya filamu 10 kwa mwezi mzima huku idadi hiyo kwa mwaka ikiwa ni wastani au chini ya sinema 120 tu hii ni kwa mujibu wa rekodi ya wasambazaji wa kazi za Sanaa nchini kwa mwaka huu wa 2015,” amesema Nyanda .

“Wasambazaji na waandaaji (producers), wa sinema na muziki wameamua kujitoa kwenye tasnia hii na kutafuta shughuli mbadala za kufanya,” amesema.

Ameongeza kuwa wasanii  wengi wa muziki wamekuwa wakisambaza kazi zao kupitia mitandao kama You-Tube ambako mashabiki wao huzichukua  bure huku  wengine huthubutu hata kugawa CD za nyimbo zao mpya bure kabisa mitaani. 

Nae msanii  wa filamu, Simon Mwapangala maarufu kama ‘Rado,’ amesema kuwa hata kampuni za usambazaji  filamu zinachangia kuua tasnia hiyo kwa kuwapa waandaaji malipo finyu; “Hawa wananunua master ya sinema moja mpya kwa shilingi milioni 10 tu, ambazo utakuta ndio gharama za ktengenezea filamu sasa hapo unabaki na nini?” alihoji.