Tanzania yatangaza takwimu za Covid-19, “284 wanapumulia mashine”

SERIKALI ya Tanzania imetaja takwimu za wagonjwa wa  wa homa kali ya mapafu, inayosababishwa na Virusi vya Corona (Covid-19), ikisema nchi nzima ina wagonjwa 408. Anaripoti Danson Kaijage, Dodoma…(endelea).

Takwimu hizo zimetolewa leo Jumamosi, tarehe 10 Juali 2021 na Waziri wa Afya, Dk. Dorothy Gwajima, akitoa takwimu za mwenendo wa wimbi la tatu la Covid-19, alipotembelea mnada wa Msalato jijini Dodoma.

Waziri huyo wa afya amesema, hadi kufikia tarehe 8 Julai 2021, wagonjwa 284 kati ya 408 wanapumua kwa kutumia mashine za oksijeni ‘Oxygen Concentrator”

Akitoa takwimu za jiji la Dodoma, amesema lina wagonjwa 26, kati yao 22 wanapumua kwa msaada wa mashine. Amesema hakuna kifo.

Dk. Gwajima amewataka Watanzania wazidi kuchukua tahadhari dhidi ya maambukizi ya ugonjwa huo, kwa kufuata miongozo ya wataalamu wa afya juu ya kujikinga nao.

Amewataka Watanzania wavae barakoa, waepuke mikusanyiko pamoja na kunawa mara kwa mara kwa kutumia maji tiririka.

Takwimu hizo zimetolewa takribani mwaka mmoja, tangu Tanzania kutoa takwimu za ugonjwa huo 2020.

Mara ya mwisho Tanzania ilitoa takwimu za ugonjwa huo, tarehe 28 Aprili 2020, kupitia Waziri Mkuu, Kassim Majaliwa, aliyesema kulikuwa na wagonjwa 480.

Tanzania ilitoa takwimu za Covid-19, takribani mwezi mmoja, tangu iliporipoti kisa chake cha kwanza cha ugonjwa huo, Machi 2020, baada ya hapo ilisitisha kutoa takwimu hizo kwa maelezo kwamba maabara iliyokuwa inapima wagonjwa wa Covid-19, ilipata hitirafu.

Hatua hiyo ya Tanzania kurejea katika desturi ya  kutoa takwimu za Covid-19, ni muendelezo wa hatua zinazochukuliwa na Rais Samia Suluhu Hassan, katika kukabiliana na janga hilo.

Tangu alipoingia madarakani tarehe 19 Machi 2021, kufuatia kifo cha mtangulizi wake, Hayati John Magufuli, Rais Samia amechukua hatua mbalimbali ikiwemo kuunda timu ya wataalamu, kwa ajili ya kufanya tathmini juu ya mwenendo wa ugonjwa huo.

Pia, ameunda muongozo wa uingizaji na utoaji chanjo ya Covid-19, unaotarajiwa kuanza kazi hivi karibuni. Kupitia mpango huo, wananchi watakaohitaji watapatiwa huduma hiyo bure.

Mara kadhaa Rais Samia amewaomba Watanzania kuchukua tahadhari dhidi ya Covid-19, hasa kwa kuvaa barakoa, kunawa mikono na kuepuka mikusanyiko.