Serikali kutoa tamko leo nyongeza mishahara

WAZIRI Mkuu wa Tanzania, Kassim Majaliwa anatarajia kutoa tamko la Serikali kuhusu nyongeza ya mishahara ya watumishi wa umma iliyoanza Julai mwaka huu. Anaripoti Mwandishi Wetu…(endelea)

Kwa mujibu wa ukurasa wa twitter wa Msemaji Mkuu wa Serikali, Waziri Mkuu Majaliwa atatoa tamko hilo leo Ijumaa tarehe 29, Julai, 2022 majira ya saa 10.00 jioni.

Tamko hilo linakuja baada ya vikao baina ya Serikali na viongozi wa Shrikisho la vyama vya Wafanyakazi (TUCTA) yalioanza Jumanne tarehe 26, 2022 ambapo katika kikao cha kwanza pande hizo zilishindwa kufikia mwafaka.

Serikali kupitia Msemaji wake Gerson Msingwa, ilisema viongozi wa TUCTA wameomba kupewa muda wa kujadiliana wenyewe suala hilo na kisha kuendelea na mazungumzo.

Tamko la Serikali kuhusu nyongeza ya mishahara ya wafanyakazi iliyoanza Julai 2022 litatolewa na Waziri Mkuu wa Jamhuri ya Muungano wa Tanzania, Mhe. Kassim Majaliwa kuanzia saa 10:00 jioni leo tarehe 29 Julai 2022 kupitia vyombo vya habari vya Redio, TV na Mitandao ya Kijamii.

— Msemaji Mkuu wa Serikali (@TZMsemajiMkuu) July 29, 2022

Musiba alisema wakishafikia muafaka Serikali itatoa tamko rasmi juu ya suala hilo.

Hata hivyo Rais wa TUCTA, Tumaini Nyamhokya alisema katika kikao hicho waliionesha Serikali namna ambavyo hawakubaliani na kiwango cha nyongeza ya mishahara na kuitaka kwenda kuangalia upya suala hilo.

Pia aliandaa mapendekezo yao kwa maandishi ambayo Jumatano tarehe 27, Julai, 2022 waliyawasilisha kwa Ofisi wa Waziri Mkuu, Menejimenti ya Utumishi wa Umma na Utawala Bora.