October 5, 2022

Uhuru hauna Mipaka

RC Makalla atoa onyo wizi miundombinu ya maji Dar

Spread the love

 

MKUU wa Mkoa wa Dar es Salaam, Amosi Makalla amekemea vikali wizi wa miundombinu ya maji ikiwemo mabomba na mita za maji unaofanywa na wananchi huku akiomba ushirikiano wa kila mmoja kudhibiti vitendo hivyo vinavyofanywa na watu wasio waaminifu. Anaripoti Mwandishi Wetu, Dar es Salaam … (endelea).

Makalla alitoa wito huo hivi karibuni wakati wa ziara ya kukagua maendeleo ya mradi wa maji Pugu – Gongo la Mboto hususani kwa wananchi waliounganishwa kupitia mradi huo uliotekelezwa na Mamlaka ya Majisafi na Usafi wa Mazingira Dar es Salaam (DAWASA).

Alisema wizi wa mabomba na mita za maji umekidhiri na kusababisha usumbufu kwa wateja pamoja na kuleta hasara kwa Serikali, hili ni jambo linalorudisha nyuma nia njema ya Serikali kwa Wananchi wake.

“Serikali inatumia fedha nyingi kuhakikisha huduma ya maji inapatikana kwa wananchi na hii ndio kazi inayofanywa na DAWASA, hivyo si vyema kwa mwananchi kuhujumu miundombinu ya maji, hili ni ni kosa kisheria,” alisema Makalla

Aidha, ameipongeza DAWASA kwa kutekeleza miradi mikubwa kwa kutumia fedha za ndani pamoja na ubunifu wa kuwaunganishia wananchi maji kwa mkopo.

Mbali na hapo, Makala aliupongeza uamuzi wa kuhakikisha maeneo ya pembezoni mwa Jiji la Dar es Salaam yanapata huduma ya majisafi.

Mkuu wa Mkoa wa Dar es Salaam, Amosi Makalla

“Miradi yote ya maji inayotekelezwa pembezoni mwa mji ni maelekezo ya Mhe. Rais Samia Suluhu Hassan katika kuhakikisha huduma ya majisafi inawafikia wananchi wote, ambapo amewapongeza DAWASA kwa kazi nzuri wanayoifanya,” alisema

“Nimepita mtaani kwenye nyumba za wateja na nimeona maji yakitoka tena kwa msukumo mkubwa, niwapongeze sana DAWASA kwa kazi nzuri mnayoifanya,” alisema

Kwa upande wake, Afisa Mtendaji Mkuu wa DAWASA, Mhandisi Cyprian Luhemeja alisema mradi wa Pugu Gongo la Mboto umetekelezwa kwa kutumia shilingi bilioni 7.3 ambazo ni fedha za ndani za Mamlaka.

Mradi umejenga tenki la maji lenye ujazo wa lita milioni 2, mradi unahudumia wakazi 450,000 wa Kata ya Pugu, Gongo la Mboto, Majohe, Bangulo, Ukonga – Airwing, Kigogo, Buyuni, Chanika, Pugu – Machimbo na Kinyerezi.

Mwanahamisi Kibuba, mkazi wa Kata ya Pugu – mpakani ameishukuru DAWASA kwa kuleta maji kwenye makazi yake na kumuondolea kero ya kutumia maji ya kisima ambayo hayakua masafi.

Alisema maji ya kisima hua sio masafi na hayafai kwa kunywa, pia wakati mwingine hua yanakauka, nimefurahi sana kupata majisafi kutoka DAWASA.

Kwa upande wake, mkazi wa Pugu Kajiungeni Rachel Clement amesema alikua anatumia fedha nyingi kwa siku kununua maji ya madumu na kumsababishia usumbufu mwingi.

“Nashukuru kwa sasa nimepata majisafi kutoka DAWASA na hivyo imesaidia kupunguza matumizi ya fedha,” alisema.

error: Content is protected !!