Friday , 3 February 2023
Home Gazeti Habari Mchanganyiko Rais Samia: Ukinikuna vizuri nitakukuna na kukupapasa
Habari MchanganyikoTangulizi

Rais Samia: Ukinikuna vizuri nitakukuna na kukupapasa

Spread the love

RAIS Samia Suluhu Hassan amewataka waandishi wa habari nchini kuzingatia sheria na kufanya kazi kwa uungwana kwani wakimkorofisha hatowaacha. Anaripoti Mwandishi Wetu … (endelea).

Pia amewataka kuandika habari za kutunza na kuheshimu mila na desturi za kiafrika.

Rais Samia ametoa kauli hiyo leo tarehe 3 Mei, 2022  jijini Arusha katika maadhimisho ya Siku ya Uhuru wa Vyombo vya Habari duniani.

Maadhimisho hayo yalikuwa na kauli mbiu isemayo “Uhuru wa vyombo vya habari na changamoto za kidijitali”.

Akitumia misemo mbalimbali ya Kiswahili iliyowaacha hoi mamia ya waandishi wa habari na wadau wa sekta hiyo waliohudhuria maadhimisho hayo, Rais Samia amesema Serikali inatumia busara kutekeleza sheria ya masuala ya habari.

“Busara tunayotumia ni ule msemo wa kizungu, ‘scratch my back I’ll scratch yours’, ukinikuna vizuri mimi nitakukuna na kukupapasa huku nakupuliza, lakini ukinipara nitakuparura… tuende tufanye kazi kwa uungwana, kuelewana, ukinikuna nitakupapasa, lakini ukinipara nitakuparura, sheria zio palepale,” amesema.

Aidha, amesema miaka ya nyuma ilikuwa ngumu kwake kukaa na kusalimiana na viongozi wa majukwaa ya waandishi wa habari kama Deodatusi Balile lakini sasa hakuna haja ya kugombana tena.

“Niulize jambo moja… tunagombana kitu gani, fikira na mueleko wote ni Watanzania, tunajenga nyumba hiyohiyo, tunagombana kitu gani! Kama kuna tofauti tukae tuzungumze tuendeleze nchi yetu. Hakuna kugombana… why tugombane! hii ndio raha ya mwanamke anakuwa anaongoza familia,” amesema.

Amesema zipo mila potofu za kupigiwa kelele na kuwaelimisha wananchi lakini zile mila nzuri zisifiwe.

“Wakati sisi tunaponda mila zetu wenzetu wanazitaka hizi hizi, lakini sio za kwao hawawezi kufanya kama sisi ndio maana unakuta mwanamke mzuri katoka nje kaolewa na mwanaume wa kiafrika ukimwangalia unasema eeh! Vipo anavyovifuata huku… ni mila, desturi na namna ya kuishi,” amesema.

Aidha, amewataka waandishi wa habari kuanzika mazuri ya kiafrika na kuacha kuwa mawakala wa vyombo vya habari vya nchi tajiri kwa kuandika mabaya ya Afrika na kutia chumvi.

Amesema hatua hiyo ya kuandika mabaya pekee ya Afrika ni sawa na kujivua nguo.

“Watanzania, mnaenda kujivua nguo na kuwaambia wengine kuwa huku hakuna demokrasia, kuna udikteta, sijui huyu mama kafanyaje. Jivunieni kilicho chenu, tukuzeni kilicho chenu. Hata akitokea nani akawaandika hatakiandika vizuri mtakavyoandika wenyewe.

“Kingine mnalindwa, serikali inawalinda, mashirika mbalimbali lakini hakuna mlinzi mzuri kama wewe mwenyewe, tazama unalofanya pima nikifika mpaka hapa inatosha, yule mama nitamkorofisha na mimi sitokuacha,” amesema.

Aidha, alimuagiza Waziri wa Habari, Mawasiliano na Teknolojia ya Habari, Nape Nnauye kukaa na vyombo vyake na kupitia maudhui yanayorushwa mitandaoni kuhusu watoto ili kukinga mila na desturi za Taifa.

“Leo kuna katuni zilizopo mitandaoni mwanaume kwa mwanaume wanabusiana, mwanamke kwa mwanamke wanashikana… hatuzidhibiti na siku hizi mtoto akizaliwa leo ukimuwekea ipad anafungua anatizama kila kitu. Kafundishwa na nani hujui, nadhani ukuu wa Mungu kawaumba hivyo,” amesema.

Leave a comment

Leave a Reply

Your email address will not be published. Required fields are marked *

Related Articles

Habari Mchanganyiko

Kasilda Mgeni anasisitiza umoja, ushirikiano Same 

Spread the love  MKUU mpya wa Wilaya ya Same, mkoani Kilimanjaro, Kasilda...

Habari MchanganyikoTangulizi

Hii hapa kauli ya Sheikh mpya mkoa wa Dar

Spread the loveSAA chache baada ya kuteuliwa kukaimu nafasi ya aliyekuwa Sheikh...

Habari MchanganyikoTangulizi

Breaking news! Mufti amng’oa Sheikh mkoa Dar

Spread the loveBARAZA la Ulamaa la Bakwata katika kikao kilichofanyika tarehe 1...

Habari Mchanganyiko

Bilioni 120 za DMDP zaibadilisha Ilala, wananchi watoa ya moyoni

Spread the loveJUMLA ya Sh bilioni 120.7 zimetumiwa na Halmshauri ya Jiji...

error: Content is protected !!