Rais Samia atoa maagizo matatu Tabora

RAIS Samia Suluhu Hassan, ametoa maagizo matatu kwa wizara na taasisi za Serikali, yenye lengo la kuchochea maendeleo ya wananchi. Anaripoti Regina Mkonde, Dar es Salaam…(endelea).

Maagizo hayo ya Rais Samia yametolewa leo Jumatano tarehe 18, 2022, wakati akizindua barabara ya Tabora-Koga-Mpanda, mkoani Tabora, halfa iliyorushwa mbashara katika vituo vya televisheni mbalimbali nchini.

Katika agizo la kwanza, Rais Samia ameagiza uongozi wa mikoa kuvutia fursa za uwekezaji na kuhamasisha uzalishaji wa wananchi wa mikoa yao.

“Nafahamu hapa Sikonge na ameneo mengine ya Tabora kuna wafugaji wa nyuki, kwa maana hiyo wanazalisha asali. Niwaombe hakikisheni asali inazalishwa kwenye viwango vya kimataifa ili tuweze kufikia masoko ya nje,” amesema Rais Samia.

Agizo la pili lililotolewa na Rais Samia, ni kwa Jeshi la Polisi mkoani Tabora, kuwakamata watu waliohusika na wizi wa miundombinu ya barabara hiyo, ikiwemo taa za barabarani na paneli za sola, uliotokea katika vijiji vinne vya Kasandalala, Tumbili, Usenga na Sikonge Mjini.

“Ni imani yangu kwamba Jeshi la Polisi litawafuatilia wale wote waliohusika na uharibifu ili hatua za kisheria ziweze kuchukuliwa. Niwaombe sana ndugu zangu tunzeni miundombinu tunayoleta,” amesema Rais Samia.

Rais Samia amewaoimba wananchi wawafichue watu wanaojihusisha na vitendo vya wizi wa vifaa vya miundombinu mbalimbali ikiwemo barabara, ili wachukuliwe hatua.

Aidha, Rais Samia ameiagiza Wizara ya Ardhi na Maendeleo ya Makazi, Taasisi ya Misitu, pamoja na uongozi wa mikoa, kupanga vyema maeneo ya malisho ya wafugaji, ili kuwe na matumizi sahihi ya rasilimali za ardhi.

“Mkiangalia idadi ya watu tulio nao Tanzania, watu wetu wengi ni vijana wadogo ambao wanaendelea kuongeza idadi ya watu. Tutakapotoa maeneo yote ya hifadhi yatumike sana kwa wananchi na vizazi vinayokuja vitakosa maeneo ya kuja kufanya mambo mengine,” amesema Rais Samia.

Aidha, Rais Samia amewataka wananchi wa Tabora kuongeza nguvu katika uzalishaji wa zao la tumbaku, kwa kuwa soko la uhakika lipo, baada ya muwekezaji kufufua kiwanda cha tumbaku mkoani Morogoro.