June 17, 2021

Uhuru hauna Mipaka

Rais Samia apokea ujumbe wa Kagame, atoa maagizo

Spread the love

 

RAIS wa Tanzania, Samia Suluhu Hassan, amepokea ujumbe kutoka kwa Rais wa Rwanda, Paul Kagame. Anaripoti Mwandishi Wetu…(endelea).

Ujumbe huo umewasilishwa leo Alhamisi, tarehe 3 Juni 2021, Ikulu ya Chamwino, jijini Dodoma na Mjumbe Maalum na Waziri wa Mambo ya Nje na Ushirikiano wa Kimataifa wa Rwanda, Dk. Vincent Biruta.

Katika ujumbe huo, Rais Kagame ametuma salamu za pole kufuatia kifo cha aliyekuwa Rais wa Tanzania, Hayati John Pombe Magufuli, kilichotokea jioni ya tarehe 17 Machi 2021, katika Hospitali ya Mzena, mkoani Dar es Salaam.

Amempongeza Rais Samia kwa kupokea kijiti cha Urais na amemhakikishia kuwa Rwanda ipo tayari kukuza zaidi uhusiano na ushirikiano wake na Tanzania.

Rais Kagame amesema, hali ya Rwanda ni shwari, inaendelea kusukuma mbele maendeleo yake na ipo tayari kukuza zaidi uhusiano wake na Tanzania hususani katika utekelezaji wa miradi ukiwemo mradi wa kuzalisha umeme wa Rusumo na ujenzi wa reli ya kisasa (standard gauge railway) ya kuunganisha Jiji la Kigali (Rwanda) na Isaka (Tanzania) ambayo itasaidia usafirishaji wa mizigo kutoka Bandari ya Dar es Salaam kwenda Rwanda.

Rais Samia amemshukuru, Rais Kagame kwa kumtumia ujumbe huo uliojumuisha salamu za pole na pongezi na amemhakikishia kuwa Tanzania ipo tayari kukuza zaidi uhusiano na ushirikiano wake na Rwanda.

Kuhusu utekelezaji wa miradi ya pamoja, ametaka Tume ya Pamoja ya Ushirikiano wa Tanzania na Rwanda (JPC) ikutane ili kuongeza msukumo katika miradi hiyo pamoja na kuainisha maeneo mapya ya ushirikiano yenye maslahi kwa pande zote mbili.

Maeneo mengine ambayo ametaka JPC ifanyie kazi ni kuimarisha usafirishaji wa minofu ya samaki kutoka Mwanza kupitia Shirika la Ndege la Rwanda na kuharakisha ujenzi wa bandari kavu ya Isaka.

error: Content is protected !!