Rais Samia aiomba benki ya dunia…

SAMIA Suluhu Hassan, Rais wa Tanzania, ameiomba Benki ya Dunia (WB), kuendelea kushirikiana katika kujenga uchumi utakaogusa makundi yote ya jamii ili kuwafikia watu masikini. Anaripoti Mwandishi Wetu, Dodoma … (endelea).

Rais Samia ametoa ombi hilo leo Jumatatu, tarehe 19 Aprili 2021, alipokuata na kufanya mazungumzo na Mkurugenzi Mkazi wa Benki ya Dunia, Mara Warwick, Ikulu ya Chamwino, mkoani Dodoma.

Katika mazungumzo hayo, Rais Samia, ameishukuru Benki ya Dunia kwa kuendelea kuwa mshirika mzuri wa maendeleo ya Tanzania.

Amemhakikishia, Warwick kuwa, Serikali ya awamu ya sita, itaendeleza na kukuza zaidi ushirikiano wake na benki hiyo katika juhudi zake za kukuza uchumi na kuinua ustawi wa wananchi wa Tanzania.

Rais Samia, ameiomba Benki ya Dunia, kuendelea kushirikiana na Tanzania (Bara na Zanzibar), katika kujenga uchumi utakaoyagusa makundi yote ya jamii hususani kuwafikia watu masikini.

Pia, kuboresha huduma za kijamii hususani elimu na afya, kuimarisha miundombinu, kuwawezesha wanawake kiuchumi ambao wamebeba majukumu makubwa ya familia, na kujenga mifumo ya kidijiti itakayorahisisha utendaji kazi ikiwemo ukusanyaji wa mapato.

Kwa upande wake, Warwick amemshukuru Rais Samia kwa kupata nafasi ya kuzungumza nae na amemhakikishia kuwa Benki ya Dunia ambayo imeanza uhusiano wake na Tanzania tangu miaka 56 iliyopita, itaendelea kushirikiana na Tanzania katika juhudi za kukuza uchumi na ustawi wa jamii huku ikizingatia Dira ya Taifa ya Maendeleo ya mwaka 2025.

Amesema, benki hiyo itaendelea kujikita kuwasaidia watu masikini na watu waishio katika mazingira hatarishi kwa kuhakikisha, inashiriki kuimarisha miundombinu, masoko, elimu ya msingi, sekondari na vyuo, kuweka mifumo ya kidijiti na kwa Zanzibar kusaidia katika mradi wa nishati ya umeme na uboreshaji wa miji na vijiji.

Warwick amesema, kwa sasa Benki ya Dunia imeidhinisha miradi yenye thamani ya Dola za Marekani bilioni 4.9 (sawa na Sh.11.2 Trilioni), inaelekea kuongeza miradi mingine mitano yenye thamani ya Dola za Marekani bilioni 1.15 (sawa na Sh.2.6 Trilioni) na mwaka ujao itaongeza zaidi hivyo kuifanya Tanzania kuwa nchi yenye miradi mingi na muhimu inayofadhiliwa na benki hiyo..

Mazungumzo hayo yamehudhuriwa na Waziri wa Fedha na Mipango, Dk. Mwigulu Nchemba.