Rais Samia ahoji fedha za Plea-Bargaining

RAIS Samia Suluhu Hassan, ameitaka Tume ya kuangalia namna ya kuboresha taasisi za haki jinai, ikapitie mchakato kisheria wa makubaliano ya kukiri kosa (Plea Brgaining), uliofanyika kati ya mtuhumiwa na Ofisi ya Mkurugenzi wa Mashkata nchini (DPP), ili kubaini mahali zilipo fedha zilizokusanywa kupitia zoezi hilo. Anaripoti Mwandishi Wetu, Dodoma … (endelea).

Akizungumza wakati anazindua tume hiyo, leo Jumanne, tarehe 31 Januari 2023, Ikulu ya Chamwino jijini Dodoma, Rais Samia amesema kuna kiasi cha fedha kinajulikana kilipo huku kiasi kingine hakionekani mahali kilipo.

Rais Samia amesema kuwa, kuna ufuatiliaji ulifanyika na kubaini kwamba kiasi cha fedha kilibainika kuwekwa katika akaunti nchini China.

“Mkaangalie katika ofisi ya mashtaka na penyewe kukoje, kuna kasoro zipi zimetokea sababu nakumbuka nyuma hapa kidogo Ofisi ya Taifa ya Mashtaka kulikuwa na ngoma kubwa inachezwa mpaka kukusanya fedha. Zile fedha za Plea Bargaining nyingine zimeonekana na nyingine hazionekani, tuki-trace utaambiwa kuna akaunti China, sijui imepeleka pesa. Tukayatizame,” amesema Rais Samia.

Utaratibu wa Plea Brgaining ulishika kasi katika uongozi uliopita ambapo aliyekuwa DPP Biswalo Mganga, aliongoza zoezi hilo ambalo lilipelekea ofisi yake kukusanya mabilioni ya fedha kutoka kwa watuhumiwa waliokuwa tayari kukiri makosa waliyofanya hasa ya uhujumu uchumi na utakatishaji fedha.

Lakini alipoingia madarakani, Rais Samia aliagiza uchunguzi ufanyike dhidi ya fedha hizo kwa ajili ya kuangalia kama haki ilitendeka, baada ya baadhi ya wahusika kudai kwamba walilazimishwa kutoa fedha hizo kinyume cha sheria.