Prof. Mkenda: Wanasiasa msitupelekeshe

PROFESA Adrof Mkenda, Katibu Mkuu wa Wizara ya Viwanda, Biashara na Uwekezaji, amewataka wanasiasa hapa nchini kuacha kuingilia masuala ya kitaalam yanayofonywa kwa kuzingatia utashi wa kitaaluma zaidi, anaandika Dany Tibason.

Pia amewaasa watumishi wa serikali kutokuwa tayari kufuata matakwa ya wanasioasa na badala yake wazingatie maadili na misingi ya kitaaluma katika majukumu yao.

Prof. Mkenda ameyasema hayo leo wakati akifungua semina ya wakurugenzi wa mipango na sera kutoka wizara mbalimbali iliyofanyika katika ukumbi wa mikutano wa Hazina mjini Dodoma.

“Katika kufanya kazi za kutengeneza mipango na sera mbalimbali za kulinda ubora wa mlaji pamoja na usambazaji wa bidhaa, ni lazima tujiepushe na matakwa ya wanasiasa ambayo yamekuwa yakiingilia kazi za wataalam,” amesema.

Prof. Mkenda amesema ili kuimarisha ubora wa bidhaa nchini lazima mamlaka husika zinatakiwa kufanya ukaguzi wa bidhaa huku wakitoa elimu kwa jamii badala ya kutumia mabavu na mashambulio kwa watu ambao wanatoa huduma mbalimbali.

Amesisitiza kuwa, katika nchi ya Tanzania kuna sheria ya kufanya biashara huria lakini hairuhusu kuwa na biashara holela ili kulinda afya za walaji.

“Ili uweze kufanya ukaguzi wa bidhaa kwa uaminifu ni lazima ujipambanue na kujiondoa katika viashiria vya rushwa. Kupenyeza rushwa kunaweza ni chanzo kikubwa cha kuzagaa kwa bidhaa bandia mitaani.

“Tujiulize wale askari walioruhusu gari lililosababisha vifo vya watoto 32 walimu 2 na dereva mmoja wa Shule ya msingi ya Lucky Vincent ya Arusha hawakuona kama watoto wamezidi katika gari hiyo na walikuwa wamevunja sharia? uzembe unaweza kuligharimu Taifa,” amesema Prof. Mkenda.