Polisi wamng’ang’ania Mtatiro, mwenyewe adai yupo Ngangari

MWENYEKITI wa Muda wa Kamati ya Uongozi ya Chama cha Wananchi (CUF), Julius Mtatito ameendelea kubaki mikononi mwa Polisi huku akituhumiwa kwa kusambaza ujumbe unaomkashifu Rais. Anaripoti Faki Sosi … (endelea).

Mtatiro alitakiwa kuripoti Polisi jana asubuhi na kuhojiwa kwa zaidi ya saa sita kabla ya kwenda kumfanyia upekuzi na kurudishwa kituoni saa nne usiku na kubaki kituoni mpaka leo asubuhi kwa ajili ya maamuzi mengine.

Hii ni taarifa rasmi kuhusu sakata hilo.

MWENYEKITI WA KAMATI YA UONGOZI CUF TAIFA MHE. JULIUS MTATIRO YUPO NGANGARI;

THE CIVIC UNITED FRONT
(CUF–Chama Cha Wananchi)

TAARIFA KWA UMMA

Imetolewa leo Tarehe 5 July,2018
Na. Kurugenzi ya Habari –CUF Taifa

Jana Tarehe 4/7/2018 Mwenyekiti wa Kamati ya Uongozi Taifa Mhe. Julius Mtatiro alipokea simu ya wito wa kuhitajika kituo Cha Polisi (Central Police) Dar es Salaam.

Leo Tarehe 5/7/2018 Mhe. Julius alikuwa amealikwa kama Mmoja wa Wageni wawezeshaji wa mjadala na Taasisi ya Twaweza katika Kongamano la kujadili MAONI YA WANANCHI KUHUSU USHIRIKI, MAANDAMANO NA SIASA lillilopangwa kufanyika katika kituo cha Mikutano cha Julius Nyerere International Convention Centre –JNICC. Ilipofika saa 3 asubuhi akiwa anaelekea huko alipigiwa simu kujulishwa afike kituoni hapo saa 4 asubuhi.

Niliambatana nae (Maharagande) mpaka kituoni hapo na tulipokelewa na ZCO na kujulishwa kuwa anahitajika achukuliwe maelezo yake kuhusu ujumbe aliotuma katika ukurasa wake wa facebook unaosema “RAIS KITU GANI BWANA”. Tukakabidhiwa Maafisa wa Polisi wa kufanya kazi hiyo. Wakati wa kuanza kuchukuliwa maelezo yake alielezwa kuwa anatuhumiwa kwa “ KUTUMA UJUMBE WA KUJELI NA KASHFA DHIDI YA RAIS WA JAMHURI YA MUUNGANO WA TANZANIA” kupitia mtandao wa kijamii. Mhe Julius amechukuliwa maelezo yake mpaka saa 10 jioni na baadae kuelekea nyumbani kwake kwa upekuzi na kurejea tena kituoni majira ya saa 4 usiku. Maafisa wa polisi wameeleza kuwa wataendelea kuwa nae mpaka kesho asubuhi na kutujulisha kama watampatia dhamana au vinginevyo.

Mwisho:

Mwenyekiti wa Kamati ya Uongozi Taifa Mhe. Julius mtatiro anawataka wanachama wa CUF kujitokeza kwa wingi Mahakamani kushuhudia Hoja makini zitakazotolewa na Mheshimiwa Bashange. Na wala wasiwe na hofu yeyote juu yake kwani yupo NGANGARI SANA. Shukrani kwa Msomi Wakili Hashimu Mziray kwa kusimamia vyema mahojiano hayo, Bakari Kasubi –Mwenyekiti wa Serikali ya Mtaa wa Mzimuni, Shaweji Mketo-Naibu Mkurugenzi wa Mipango na Uchaguzi CUF Taifa, Anderson Ndambo na Kassimu Chogamawano[maafisa wa Kurugenzi ya Habari Taifa] kwa Uratibu wenu wa suala hili mpaka saa 5 za usiku huu.

HAKIKA TUPO VIZURI SANA, MAPAMBANO YA KISHERIA YANAENDELEA NA HAKI ITASHINDA.

HAKI SAWA KWA WOTE

MBARALA MAHARAGANDE
NAIBU MKURUGENZI WA HABARI, UENEZI
NA MAHUSIANO NA UMMA-TAIFA.