May 29, 2022

Uhuru hauna Mipaka

Polisi shirikianeni na wananchi kubaini magaidi – Rais Samia

Rais Samia Suluhu Hassan

Spread the love

 

RAIS wa Tanzania, Samia Suluhu Hassan, ameliagiza Jeshi la Polisi, lishirikiane na raia katika kuwabaini watu wanaojihusisha na vitendo vya ugaidi. Anaripoti Regina Mkonde, Dar es Salaam … (endelea).

Amri Jeshi huyo mkuu wa Tanzania, ametoa agizo hilo leo Jumatano, tarehe 25 Agosti 2021, akifungua kikao kazi cha maafisa wakuu waandamizi na makamanda wa Polisi wa mikoa wa jeshi hilo, Oysterbay, mkoani Dar es Salaam.

Ameliagiza jeshi hilo lijenge urafiki wa karibu na raia, ili watoe ushirikiano wa kuwafichua watu hao wanaokaa katika makazi yao.

“Kuna suala jingine la jeshi kuwa ndani ya makazi ya raia kutokana na mawimbi ya kuenea ugaidi, haya magaidi sasa wanambinu ya kukaa ndani ya raia huko mitaani. Wanajichanganya tu, inawezekana unakaa naye nyumba moja lakini humjui huyu ndiye,” amesema Rais Samia.

Rais Samia amesema “sasa hii inatufanya jeshi tukajenge urafiki kwa raia, ili raia wawe na moyo na imani ya kutuambia nani ni nani katika maeneo yao. Tukitegemea wenyeweviti wa mitaa huenda tukakosa taarifa.”

Aidha amesema, jukumu la ulinzi na usalama katika makazi ya raia halipaswi kuwa la Polisi jamii peke yake, bali Askari Polisi wanatakiwa kujenga urafiki wa karibu na wananchi.

“Badala ya kuwafanya Polisi jamii nao washike virungu usiku wasaidie kulinda, kuwe na Polisi jamii kujua nani ni nani na hicho ndicho kinasumbua nchi jirani.”

“Wahahalifu wako ndani ya jamii na jamii wasipokuwa na imani na jeshi hawatoi taarifa, lakini wakiwa na imani watatoa taarifa na kuwachukua kirahisi,” amesema Rais Samia.

Pia, Rais Samia amewaagiza maafisa wa vyombo vya ulinzi na usalama, kushiriki vikao vya ulinzi na usalama vinavyofanyika katika nchi jirani, ili kujua hali ya usalama wa mipaka ya nchi.

“Vikao vya ulinzi na usalama jirani na vyenyewe nahamasisha, si kwa fujo nita-control (dhibiti) hizo safari, lakini tuweke sawa tuone nchi yetu inakuwa salama, hili ni kwa vyombo vyote na si Polisi,” amesema Rais Samia.

Wakati huo huo, Rais Samia ameagiza Askari Polisi kukwepa kuishi katika makazi ya raia, ili kujiweka mbali na vitendo vya ushawishi.

“Kupanga kwao au kukaa kwao mitaani kunawafanya wazoeleke na jamii na hata kama mhalifu jirani yake au amepanga naye nyumba moja, atasita sana kumsema kwamba huyu mhalifu. Hilo nalo mliangalie,” amesema Rais Samia.

“Kwenda kwa jamii sawa lakini mnakwendaje? Sio kwenda kabisa kabisa, kule kwetu mkipeleka wanajeshi au askari wakifika tuna muangalia interest yake ni nini, siku ya tatu tunampa mchumba akioa kazi imekwishia hapo, hafanyi sababu ni mmoja wa ukoo ule.”

error: Content is protected !!